Առանց դրայվի

Այսպիսով՝ տնտեսությունը փրկելու եկած Կարեն Կարապետյանի կաբինետի ներկայացրած հաջորդ տարվա բյուջեի նախագիծը ոչ միայն փոփոխությունների հույս չի ներշնչում, այլեւ դիմակայության բյուջեի բնորոշումը ստացավ: Ոչ աշխատավարձերի, ոչ թոշակների բարձրացում չի նախատեսվում, ինչը հետաքրքրում է շարքային քաղաքացիներին: Քանզի կյանքը գնալով թանկանում է, իսկ մարդկանց կենսամակարդակը՝ մնում նույնը: Անշուշտ, Կարեն Կարապետյանի կաբինետի պատասխանատուները բացատրեցին, որ ֆինանսներ չկան, սակայն պարզվեց, որ վիճակն այնքան օրհասական է, որ մեծ գումարներ չի հատկացվում անգամ բանակին: Հաշվի առնելով ապրիլյան քառօրյա պատերազմը ու այդ օրերին երեւան ելած բանակի անմխիթար վիճակը՝ կարելի էր կարծել, որ ցանկացած գնով գումարներ կուղղվեն այս համակարգ, որը ազգային անվտանգության կարեւորագույն բաղադրիչն է: Ինչեւէ, չի լինելու: Իսկ դրանից հետո մնացյալի մասին հավակնոտ խոստումները եւ նախանշած ցուցանիշները գրոշի արժեք չունեն: Ազգային ժողովի պաշտպանության, ազգային անվտանգության եւ ներքին գործերի ու ֆինանսավարկային հարցերի մշտական հանձնաժողովը հոկտեմբերի դռնփակ նիստից առաջ լրագրողների հետ զրույցում անկեղծ խոստովանեց այդ մասին. «Հաշվի առնելով, որ պաշտպանության նախարարության բյուջեն հասկանալի պատճառներով փակ է, ես ձեզ կարող եմ ընդհանուր քաղաքականության առումով ասել, որ բյուջեի մեծ ավելացում չի սպասվում: Այն, ինչ նախատեսվում է, բնականոն աճի շրջանակներում է, բայց մենք ունենք ներքին լուրջ վերաբաշխումներ՝ կապված խնայողությունների հաշվին մարտական եւ սպառազինության, ինչպես նաեւ ներսում ռազմաարդյունաբերական համալիրի զարգացման վրա՝ գումարների ավելացման առումով: Դա պաշտպանության նախարարության քաղաքականությունն է, եւ այդ քաղաքականությունը՝ եկող տարում: Մենք դեռ ունենք ժամանակահատված մինչեւ բյուջեի ավարտական փուլին հասնելը, եւ այդ ժամանակն օգտագործվելու է նաեւ այդ ուղղությամբ»,- ասել է նա:   Թե ինչպիսի խնայողությունների մասին է խոսքը, կամ ինչպես է հնարավոր եղել խնայողություններ անել, երբ բանակը բազում խնդիրների առաջ է կանգնած, նախարարը չի մանրամասնել: Դրա փոխարեն ոստիկանական համակարգում հարկ չեն համարում անձնակազմի օպտիմալացման անցնել: Ոստիկանական համակարգը պարազիտների բանակ է հիշեցնում, որոնց հիմնական գործառույթը ընդդիմադիրների միտինգներ ցրելն ու ժողովրդական բողոքի ակցիաների ժամանակ ծառայություններ մատուցելը իշխանություններին: Փոխոստիկանապետ Վարդան Եղիազարյանից պատգամավոր Միքայել Մելքումյանը հետաքրքրվեց, թե քանի ոստիկան ունենք, սակայն խնդրահարույց լինելու դեպքում, պատգամավորը խնդրեց համեմատականներ անցկացնել: Վարդան Եղիազարյանն ասաց, որ այդ թվերը գաղտնի են. «Ըստ մեր մեթոդաբանության եւ մեր ունեցած թվերի, մենք բավականին լավ դիրքերում ենք այն տեսանկյունից, որ միշտ շահարկվում է Հայաստանում ոստիկանների թիվը գերչափազանցված է: Այդպես չէ»,- ասաց նա: Նա հավելեց, որ հարյուր հազար բնակչին ընկնող ոստիկանների տեսակարար կշիռը Բուլղարիայից, Չեխիայից, Կիպրոսից, Սլովենիայից, Մակեդոնիայից ցածր է: Ըստ նրա, այդ թիվը համադրելի եւ մոտ է Էստոնիային, Ավստրիային. «Այնպես որ մենք սկզբունքայնորեն համաձայն չենք լրատվամիջոցներով տարածվող լուրերին եւ ստեղծված հասարակական կարծիքին, որ Հայաստանում իբր թե չափից ավելի ոստիկանական ուժեր կան»: Դրայվից զուրկ էր ոչ միայն դրայվի սիրահար Կարեն Կարապետյանի ծրագիրը, այլեւ այդ ծրագրի քննարկումը: Ընդդիմադիրների սուր ելույթներ գրեթե չլսվեցին, հավանաբար ավանդույթի համաձայն ընդդիմադիրները ամբիոն կճոճեն լիագումար նիստի ժամանակ, տեսախցիկների առջեւ: Միակ աշխուժությունը եղավ Հրանտ Բագրատյանի ելույթի ընթացքում, որում նա ԱՎԾ պետին վերագրեց ստի մոնոպոլիան:«Նայեք, 2007-ին հանրապետականը ընտրվեց պառլամենտ: Եվ մի հատ էլ 2012-ին՝ խոստանալով 7% աճ: Այս տարի վերջանում է ձեր 10-ամյա ժամկետը: 7, 8, 9, 10, 11, 12, 13, 14, 15, 16: Թվերը սրանք են: Պլյուս 12՝ 2007-ին, պլյուս 6.8՝ 2008-ին, մինուս 14.5՝ 2009-ին, պլյուս 2.1՝ 2010-ին, պլյուս 4.7՝ 2011-ին, պլյուս 7.2՝ 2012-ին, մինչ վարչության պետը նստած է՝ չի թողնի, որ սուտ ասեմ, քանի որ սուտ ասելու մոնոպոլիան իրենն է: Անընդհատ ասում եք մաֆիոզներին հանեք կառավարությունից, բան... ինձ թվում է տնտեսագիտական թիմը, մանավանդ ձեր բացատրությամբ, լուրջ պրոբլեմներ ունի: Ամենամեծ խնդիրն այսօր դուք եք: Դուք, փոխվարչապետը, կենտրոնական բանկի ղեկավարությունը: Այ ընկերներ, աճ եք խոսք տվել, գնացեք գտեք էդ աճը: Բա դուք ինչի՞ համար եք», -վրդովվեց Հրանտ Բագրատյանը, հետո դահլիճում նորին գերազանցության տաղտուկը տիրեց:   Անի Սահակյան