ԱԺ փոխնախագահներից մեկը պարտադիր ընդդիմադիր պետք է լինի

Ազգային ժողովի պետաիրավական հարցերի մշտաան հանձնաժողովի նախաձեռնությամբ մեկնարկեց «ԱԺ կանոնակարագ» օրենքի նախագծի վերաբերյալ աշխատանքային քննարկումները: Հանձնաժողովի նախագահ Հովհաննես Սահակյանը նախագծի ներկայացնելուց առաջ հայտարարեց, որ կանոնակարգի փոփոխությունը նպատակ ունի ձևակերպել այն լիազորությունները, որոնք տալիս է նոր ընդունված Սահմանադրությունը: Ըստ նոր կանոնակարգի՝ որևէ օրենք չի կարող նիստի օրակարգ մտնել, եթե քննարկման առարկա չի դարձել ԱԺ մշտական հանձնաժողովի նիստում. «Բացառությամբ այն դեպքերի, եթե կառավարությունը հիմնավորի, որ նախագիծը կարևոր է մեր երկրի, մեր պետության համար և պետք է արտահերթ քննարկման առարկա դառնա»: Փոփոխությունների մաս է կազմում նաև խմբակցությունների ամենաշաբաթյա պարտադիր նիստեր գումարելը. «Խմբակցությունների նիստերի ժամանակ որոշումները պետք է կայացվեն ձայների մեծամասնությամբ, և այդ որոշումները լեգիտիմ են, եթե խմբակցության նիստին ներկա են խմբակցության անդամներից կեսից ավելին»: Ընդդիմադիրներին տրվող արտոնությունների մասին էլ Սահակյանն ասաց, որ ԱԺ փոխնախագահներից մեկը պետք է անպայման լինի ընդդիմադիր պատգամավոր: «Մի շարք խնդիրներ, հարցեր, գործառույթներ, որոնք այժմ վերապահված են Ազգային ժողովի նախագահին եւ Ազգային ժողովի նախագահը միանձնյա է որոշում այդ հարցերը, դրանք այլեւս կանցնեն Ազգային ժողովի խորհրդի լիազորությունների ներքո: Սա նույնպես կոլեգիալ մարմին է, եւ սրանով մենք ապահովել ենք որոշումների ընդունման լեգիտիմությունը»,- ասաց Հովհաննես Սահակյանը: Նոր կանոնակարգով ԱԺ-ում նոր մարմին կստեղծվի՝ ԱԺ խորհուրդ, երկուշաբթի օրը նիստ կգումարի Ազգային ժողովի խորհուրդը, որը կազմված է լինելու բոլոր խմբակցությունների ղեկավարներից: Նրանք հնարավորություն կունենան որոշելու նիստի օրակարգը, հարցերի հերթականությունը և արդեն երեքշաբթի օրավանից մինչև ուրբաթ օրը՝ ժամը 10:00-ից մինչև 18:00-ն, խորհրդարանը կգումարի նիստեր: ՀՅԴ-ական պատգամավոր Արմեն Ռուստամյանը նախագծի վերաբերյալ բազում դիտողություններ ուներ, նա դժգոհեց, որ այն չի արտացոլում բոլոր այն լիազորությունները, որոնք նոր Սահմանադրությամբ տրվում են Ազգային ժողովին: «Ես իսկապես համարում եմ, որ մենք մեր մոտեցումը պետք է իրար հետ ճիշտ ուղղությամբ տանենք: Սա չի կարող համարվել ԱԺ կանոնակարգի փոփոխություն: Այնպիսի տպավորություն է ստեղծվում, թե վերցրել ենք հինը և փորձել ենք հարմարեցնել ինչ-որ կարգերի»,- ասաց Ռուստամյանը: Նա նշեց, որ նոր ընտրվող խորհրդարանը լինելու է առաջնային մանդատ ունեցող միակ մարմինը, ինչը պետք է արտացոլված լինի կանոնակարգում. «Իշխանությունը ծագում և ձևավորվում է այս մարմնով: Սա չի երևում, սա գլխավոր հարցն է, որ այս կանոնակարգով պետք է երևա: Այսինքն՝ ԱԺ-ի կանոնակարգով պետք է երևա Ազգային ժողովի բոլոր լիազորությունների իրացումը: Ընտրական օրենսգրքից հետո մյուս կարևոր, համակարգաստեղծ օրենքն այս «ԱԺ կոնոնակարգ» օրենքն է»: Նա խորհուրդ տվեց ուսումնասիրել խորհրդարանական կառավարման մյուս երկրների եւ չշտապել։ ՀՀԿ-ական Վարդան Այվազյանն էլ հետաքրքրվեց՝ արդո՞ք ճիշտ չի լինի անցնել եռօրյա նիստեր անցկացնելու կարգին: Նա կարծիք հայտնեց, թե երբ ասվում է, որ ԱԺ կանոնակարգը լիազորություն է տալիս, որևէ վերահսկողություն իրականում չկա. «Վերահսկողական մեխանիզմներ չկան, սրանք ընդամենը բառեր են»: ՀՀԿ խմբակցության պատգամավոր Խոսրով Հարությունյանն էլ հայտարարեց, թե կարիք չկա շտապել կանոնակարգի ներկայացման համար: Նա հայտարարեց, թե 50 առաջարկ է ներկայացրել կանոնակարգի վերաբերալ, այն դեպքում, երբ ինքը դեռ մինչև 50-րդ հոդվածն է հասցրել ուսումնասիրել: «Այսինքն՝ ամեն հոդվածի վերաբերյալ մեկ առաջարկ եք ներկայացրել » նկատեց Հերմինե Նաղդալյանը: ՀՀԿ-ականը հայտարարեց, թե իր համար անթույլատրելի է պատգամավորին խմբակցությունից հեռացնելու դրույթը, քանի որ եթե պատգամավորը չի կիսում իր խմբակցության կարծիքը, նրան չպետք է հեռացնեն խմբակցությունից: Անի Սահակյան