Թեժ ընտրապայքար Դիլիջանում

Փետրվարի 14-ին Տավուշի մարզի Դիլիջան, Սյունիքի մարզի Տաթեւ եւ Լոռու մարզի Թումանյան համայնքներում տեղական ինքնակառավարման մարմինների ընտրությունն են սպասվում: Դա նշանակում է, որ հիշյալ համայնքներում արդեն իսկ մրցակցային լարված իրավիճակ է: Նշենք, որ հունվարի 26-ին լրացել է թեկնածուների գրանցման վերջնաժամկետը։ Թումանյան քաղաքում  առաջադրվել են երկու թեկնածուներ՝  գործող քաղաքապետ Լեւոն Զավարյանը եւ Թումանյանի քաղաքապետարանի առաջին կարգի մասնագետ Էդգար Պետրոսյանը: Նկատենք, որ  երկու թեկնածուն էլ ՀՀԿ անդամներ են: Ի տարբերություն Թումանյանի՝ Տաթեւ համայնքն ունի երեք թեկնածու՝ նախկին քաղաքապետ, ՀՀԿ-ի կողմից առաջադրված Մուրադ Սիմոնյանը և անկուսակցականներ Իգոր Աբրահամյանն ու Վարշամ Բագրատյանը, ովքեր ինքնառաջադրմամբ են հանդես եկել: Երեք թեկնածու է առաջադրվել Դիլիջանի քաղաքագլխի ընտրություններում: Ի սկզբանե, գրանցված են եղել երեք թեկնածուներ՝ Դիլիջանի գործող քաղաքապետ, ՀՀԿ-ական Արմեն Սանթրոսյանը, Դիլիջանի նախկին քաղաքապետ, անկուսակցական Ժորա Սահաբալյանը և ՀՀԿ-ական Պապիկ Թամամյանը, ով Դիլիջանի քաղաքապետի խորհրդատուն էր: Պապիկ Թամամյանը հրաժարվել է քաղաքապետ դառնալու իր ցանկությունից, երբ  հայտնվել է երրորդ թեկնածուն՝ Ժորա Սահաբալյանը, ինչից կարելի է ենթադրել, որ նրա առաջադրումը ունեցել է զուտ ընտրությունները չտապալելու նպատակ: Հայելի.am-ի տեղեկությունների համաձայն` լարված մրցակցություն է սպասվում հատկապես Դիլիջանում: Աստղիկ Ավագյան