Հանդիպել են Թուրքիայի, Ֆրանսիայի և ԱՄՆ-ի պաշտպանության նախարարները

Բրյուսելում կայանալիք` ՆԱՏՕ-ի անդամ երկրների պաշտպանության նախարարների  ժողովից  առաջ Թուրքիայի, Ֆրանսիայի և ԱՄՆ-ի  ՊՆ ղեկավարներն առանձին հանդիպում են ունեցել. տեղեկացնում է Ermenihaber-ը: Թուրքական  Mynet լրատվական կայքը, հղում անելով ռազմական աղբյուրների, նշում է,  որ եռակողմ հանդիպման ժամանակ քննարկվել են Սիրիայում ստեղծված իրավիճակը, ինչպես նաև «Իսլամական պետություն» (ԻՊ) ահաբեկչական կազմակերպության դեմ պայքարի մանրամասները: Մասնավորապես` խոսվել է Իրաքի Մոսուլ քաղաքում տեղի ունեցող օպերացիայի մասին, որի նպատակն  է քաղաքը մաքրել ԻՊ-ի ահաբեկիչներից: Նշվում է, որ կողմերի միջև ձեռք է բերվել համաձայնություն` ԻՊ-ի դեմ պայքարի  հիմնական սկզբունքների հարցում: Հանդիպման ժամանակ Թուրքիայի  պաշտպանության նախարար Ֆիքրի Ըշըքը շեշտել է, որ չպետք է թույլ տալ, որպեսզի  այժմ  ԻՊ-ի վերահսկողության  տակ գտնվող Մոսուլ, Ռաքքա և Թելաֆ քաղաքների  ժողովրդագրական պատկերը խախտվի: Իրենց համաձայնությունն են տվել ԱՄՆ-ի պաշտպանության նախարար Էշթոն Քարթերը և Ֆրանսիայի ՊՆ ղեկավար Ժան  Իվ լե Դրիանը: Թուրքիայի պաշտպանության նախարարը նաև անդրադարձել է Թուրքիայի  կողմից Մոսուլի օպերացիային մասնակցության հարցին: «Իրաքում կոալիցիայի օդային օպերացիային մասնակցելու հարցում  ոչ մի խոչընդոտ չկա: Մեր ինքնաթիռները պատրաստ են գործել»,- ասել է Ըշըքը: Նա նաև զգուշացրել  է, որ Մոսուլից սկսվելու է զանգվածային արտագաղթ, և գաղթողներն առաջին հերթին շարժվելու են դեպի Թուրքիա, իսկ աղթի հետևանքով քաղաքական ու սոցիալական մի շարք խնդիրներ են առաջանալու ոչ միայն  տարածաշրջանային երկրների, այլ նաև  Եվրոպայի համար: