Ուր են տանում սպանության թելերը

Կիրակի օրը Մոսկվայում սպանվել են Մալաթիա թաղամասի բնակիչներ Արմեն Իսրայելյանը՝ «Ձուկ» կամ «Ձկնկուլ» մականունով, եւ նույն թաղի բնակիչ Էդուարդ Նշանյանը, որի մականունը «Ճուտ» էր։ Այս սպանությունն անմիջապես դարձավ օրվա իրադարձությունը, քանի որ սպանվածներից մեկը՝ Արմեն Իսրայելյանը, ԱԺ պատգամավոր Սամվել Ալեքսանյանի հետ հին հաշիվներ ուներ, որի մասին մամուլը ո վաղ անցյալում անդրադարձել էր: Նա ամիսներ առաջ հարցազրույցներ էր տվել Հայկական ժամանակ օրաթերթին՝ ահազանգելով պատգամավորն ունեզրկել է իրեն, խլել ողջ բիզնեսը, առեւանգել է իրեն եւ մի քանի օր պահել պահեստներից մեկում։ Սպանությունը կատարել է դիպուկահարը։ Ազգային Ժողովի ՀԱԿ խմբակցության պատգամավոր Նիկոլ Փաշինյանը խորհրդարանում այսօր հանդես է եկել հայտարարությամբ, կապված Մոսկվայում նախօրեին երկու հայաստանցիների սպանության միջադեպի հետ: Նրանցից մեկը, Արմեն Իսրայելյանը, եղել է պատգամավոր Սամվել Ալեքսանյանի նախկին աշխատակիցներից մեկը: Նիկոլ Փաշինյանը հիշեցրել է, որ Արմեն Իսրայելյանը բոլորովին վերջերս հայտարարություններ էր արել այն մասին, թե ինչպես են Ալեքսանյանի հրահանգով տարբեր բռնություններ գործադրել տարբեր անձանց հանդեպ, ընդհուպ սպանություններ: Այդ առիքով Հատուկ քննչական ծառայությունը հարուցել է քրգործ, որը սակայն կարճել էր մեկ շաբաթ առաջ, ինչպես նշել է Փաշինյանը: Նա հայտարարել է, որ ակնհայտ է Մոսկվայում կատարված սպանության հարցում վարձու մարդասպանի ձեռքը: Փաշինյանի խոսքով`  Արմեն Իսրայելյանի սպանության վերլուծությունը հետքերը բերում է Հայաստանի խորհրդարան: Թեեւ, Նիկոլ Փաշինյանը անուններ չի տվել, սակայն վերլուծությունը բերում է եզրակացության, որ նա ակնարկում է Իսրայելյանի սպանության հարցում Սամվել Ալեքսանյանի շահագրգռության եւ հնարավոր մասնակցության մասին: ԱԺ ՀՀԿ խմբակցության ղեկավար Վահրամ Բաղդասարյանը խորհրդարանում լրագրողների հետ զրույցում ասաց, որ բացառում է, թե Մոսկվայում Ձկնկուլի և նրա ընկերոջ սպանության թելերը բերում են դեպի ՀՀ ԱԺ: “Մեր գործընկերները շատ ծանր հայտարարություններ են անում և իրենց խղճի դեմ պատասխան պիտի տան”,- ասաց Բաղդասարյանը՝ անդրադառնալով Նիկոլ Փաշինյանի հայտարարությանը: Նա նշեց, որ կատեգորիկ բացառում է Փաշինյանի վարկածը, թե Սամվել Ալեքսանյանը կապ ունի այս դեպքի հետ:“Դա լավ երևույթ չէ, որ ցանկացած դեպքով փորձում են իրենց գործընկերներից քաղաքական վրեժխնդրությունը լուծել, դա անընդունելի է: Ես հորդորեցի մեր գործընկերոջը, որ իրենց ընդդիմադիր կերպարը կերտելու համար պետք չէ անհատների քննադատության միջոցով դա անել: Իրենց ընդդիմադիր կերպարը պետք է քաղաքական հայացքներով կերտեն, ոչ թե չեղած բաները մարդկանց վերագրելով”,- նշեց Բաղդասարյանը: Անի Սահակյան