Թուրքիան այժմ պառակտված է. ամերիկացի վերլուծաբան

Հայտնի վերլուծաբան Մայքլ Ռուբինը Ձեռներեցության ամերիկյան ինստիտուտի (The American Enterprise Institute) հանդեսի նոր համարում տեղ գտած Թուրքիայի մասին հերթական աղմկահարույց հոդվածում նշել է, որ Թուրքիան այժմ պառակտված և բևեռացված է՝ ինչպես երբևէ: Այս մասին գրում է թուրքական diken.com.tr կայքը: «Թուրքիան այժմ պառակտված և բևեռացված է՝ ինչպես երբևէ: Սա ավելի խորը պառակտվածություն է, քան Ադնան Մենդերեսի կամ 1970-ականների շրջանում եղածը: Թուրքիայում Էրդողանին աջակցողների թիվն ամենաշատը 50 տոկոս է: Էրդողանը կարծում է, թե մյուսներին էլ կարող է վախեցնել առանց երկրում խաղաղության և կայունության ապահովման: Սակայն նա սխալվում է»,-գրում է Ռուբինը։ Նա նշում է, որ նախագահ Ռեջեփ Թայիփ Էրդողանն իր կառավարման այս ոճով այլախոհներին մեկուսացնելուց բացի ուրիշ ոչինչ չի անում: «Տասնյակ հազարավոր մարդկանց ձերբակալում է, աշխատանքից ազատում, թողնում առանց գումարի, իր պես չմտածող բոլորին մատնում է հուսահատության: Այս ամենի հետ մեկտեղ քրդական հարցը տեղից չի շարժվում», - գրել է Ռուբինը: Իր նախորդ հոդվածներից մեկում Ռուբինն Էրդողանին անվանել էր «քայլող դիակ» և հայտարարել, որ հաջորդ հեղաշրջման պարագայում Էրդողանը կարող է ողջ դուրս չգալ այդ պատմությունից: Մայքլ Ռուբինը բազմիցս հայտնել է Թուրքիայում հեղաշրջման փորձի վերաբերյալ իր տեսակետը, ըստ որի հուլիսի 15-ի հեղաշրջման փորձն Էրդողանի կողմից բեմադրված թատերական ներկայացում էր: