Մեծահարգ վարչապետին հուշում՝ մտերմաբար
Վարչապետի պաշտոնին նշանակվելուն պես Կարեն Կարապետյանը գուժեց, որ տնտեսության վիճակը չափազանց ծանր է, ՀՀԿ-ականերն էլ միաժամանակ երջանկացած գոռգոռացին, թե ամենափրկիչ է հայտնվել ու շուտով Հայաստանը կդարձնի Սինգապուր: Ինչ է անում Կարեն Կարապետյանը, որն է եղել վարչապետի <<առաջին օգնությունը>> հոգեվարքի մեջ գտնվող տնտեսությանը: Մեկ ամսից ավելի է նա վարչապետի պաշտոնում է, բայց այդպիսի քայլեր դժվար թե մեկը հիշի: Փոխարենը Կարապետյանը որդեգրել է PR մոտեցում ու կառավարության նիստերի ժամանակ իրեն բնորոշ ոճով շշպռում է նախարարներին, ցույց տալիս նրանց անիմաստ ջուր ծեծոցին, նրա կողմից տրված մի քանի հանձնարարականներն էլ այնքան խոցելի են, որքան Կարապետյանի նկատմամբ հին կառավարության պատկերացումները: Այսպիսով՝ սկսենք վերջից, իսկ կառավարության վերջին նիստում մեծահարգ/բառի հեղինակային իրավունքը Հովիկ Աբրահամյանի մտերիմ Արփինե Հովհաննիսյանի, որը համատեղության կարգով նաեւ արդարադատության նախարար է/ վարչապետը կարգադրեց բացառել դպրոցներում մայր-աղջիկ բարձր պաշտոնների նշանակումը, քանի որ կա շահերի բախում:Այն դեպքում, որ նորանշանակ Կարապետյանի կաբինետը, հաշվված բացառություններով, ձեւավորվել ու շարունակում է համալրվել նույն սկզբունքով: Հին նախարարներին փոխարինելու են եկել Կարապետյանի կամ ընկերները, կամ դասընկերները, որոնք աշխատել են Գազպրոմում կամ քավոր-սանիկները: Համակարգային մտածողություն ու փիլիսոփայությունը մինչդեռ պահանջում էր որոշ ժամանակ, որը փորձություն պետք է դառնար տվյալ անձի ու հետագա պաշտոնավարման համար: Այլապես ստացվում է, որ որեւէ հիմնարկում բարեկամական-ազգակցական կապերով աշխատակազմը մահացու մեղք է, բացառությամբ կառավարության, այլ կերպ ասած՝ միայն վարչապետի բարեկամներն ու ազգուտակն են օժտված լավ աշխատելու շնորհով: Դիցուք՝ այսօր Նարեկ Ադոնցը նշանակվել է վարչապետի օգնական: Կարապետյանը եղել է Ադոնցի հարսանիքի քավորը: Նարեկ Ադոնցը Իսպանիայում ՀՀ արտակարգ և լիազոր դեսպան Ավետ Ադոնցի որդին է, 2011-ին էլ է Կարեն Կարապետյանի օգնականը եղել` Երևանի քաղաքապետ եղած ժամանակ : Իսկ պետական ապարատը կրճատելու մասին Կարապետյանի հայտարարությունները կարծես թե շրջանցում են իր իսկ ղեկավարած կառույցը: Կարապետյանն ունի տասը խորհրդական, որից չորսը՝ հասարակական հիմունքներով: Դրա փոխարեն կկրճատվեն, կօտիմալացվեն ԾԻԳ-երն ու ՊՈԱԿ-ները, այս մասին վարչապետը ազդարարել էր ավելի վաղ: Ում համար հայտնի չէ, ասենք, որ այս կառույցներում աշխատում են հասարակության միջին խավի ներկայացուցիչները եւ այս կրճատումները լրջագույն հարված են հասցվելու հարյուրավոր, եթե չասենք հազարավոր ընտանիքների:Իհարկե, վատ միտք չէ գնալ խնայողությունների ճանապարհով, բայց պարզ հաշվարկը ցույց է տալիս, որ դրանք ավելի քիչ բեռ են բյուջեի վրա, փոխարենը մի քանի հարյուր ընտանիքի լինելիության հարց կարող են լուծել: Կարապետյանին մտերմաբար կարելի է հուշել, որ ճիշտ կանի նախ բռնի խոշորների գլխից, հետո միայն հասնի մանրերին, համենայն դեպս այս մոտեցումը հրապարակավ ողջունվել է Սերժ Սարգսյանի կողմից: Օրինակ քայլեր ձեռնարկի ազատականացնելու մի շարք ապրանքատեսակների շուկաները ու ազատ գործելու շանս ընձեռի մանր ու միջին ձեռնարկատերերին: Տարբերակները շատ են ու կարծում ենք Կարեն Կարապետյանը բոլորից լավ գիտի տնտեսությունը բուժելու դեղատոմսերը, բայց չգիտես ում աչքերին է թոզ փչում ու գլոբալ խնդիրներ լուծելու փոխարեն ընկել է մանրերի հետեւից: Քաղաքապետության ժամանակ էլ Կարապետյանը նույն մոտեցումներն էր որդեգրել, պատճառները լուծելու փոխարեն, լծվում էր հետեւանքնեի վերացմանը , ինչպես փողոցային առեւտրի վերացման հարցում, որի դեպքում եղավ այն, ինչ եղավ: Հավանաբար Տարոն Մարգարյանը սերտելով իր նախորդի սխալները՝ տրամագծորեն հակառակ գծից սկսեց, օրինակ գրեթե ավարտին է մոտենում Վերնիսաժի վերակարգման ծրագիրը եւ շուտով առեւտրականները առավել քաղաքակիրթ պայմաններում կաշխատեն: Կարապետյանի այս մոտեցումը կապկում է նախկին վարչապետ Տիգրան Սարգսյանի նախընտրած գործելաոճին, որը որդեգրել էր կրիտիկական զանգվածի դժգոհությունները ոչ թե լուծելու, այլ դրանք ավելի խորացնելու գործելաոճը: Իսկ այս դեպքում երկու ճանապարհ կա՝ կա՛մ այդ հատվածը կբռնի արտագաղթի ուղին, կա՛մ կաթիլ առ կաթիլ կհասունանա սոցիալական բունտի հավանականությունը: Անի Սահակյան
Հետևեք մեզ Viber-ում
