Ֆենոմենալ ժլատը

Արա Աբրահամյանը որոշել է պետական մակարդակով խայտառակել «ռեսպուբլիկան»: Նա հետեւություններ չի արել նախորդ օրվա խայտառակությունից հետո ու նոր խայտառակության մեջ է հայտնվել: Ամիսների բացակայությունից հետո Հայաստտան ժամանած ալամ աշխարհի միության նախագահը  ԵՊՀ-ում ինչ որ միջոցառման ժամանակ պայթեցրել էր դահլիճը իր այլմոլորակային լեզվով, նա կիսառուսերեն, կսիահայերեն, ավելի ճիշտ երկու լեզուների աղավաղման արդյունքում ծիծաղի առարկա էր դարձել: Արա Աբրահամյանի մտքի երեկվա գոհարներից ընդամենը հիշենք այս փոքրիկ պարբերությունը.«Մենք պատրաստվում էինք գրել մի այսպիսի գիրք Հայ ժողովրդի դերը միջին դարերում ունեցած… մենք որպես ասենք առեւտրական նավատորմի ազդեցությունը… Ես ռուսերենը չսովորեցի, հայերենն էլ մի քիչ բավականին… Ռոլ Արմենիա միջին դարերի…»:Բայց այսքանից հետո նույնիսկ աշխարհի մեծահարուստ հայերից մեկը հարկ չի համարել մի կարգին թարգմանիչ վարձել, որպեսզի խուսափի հերթական խայտառակությունից: Նա իր իսկ կողմից կազմակերպված Եվրասիական գործընկերության միջազգային համաժողովին, ի տարբերություն ՀՀ վարչապետ Կարեն Կարապետյանի եւ նախկին վարչապետ եւ ներկայումս Եվրասիական տնտեսական հանձնաժողովի խորհրդի նախագահ Տիգրան Սարգսյանի, ելույթ է ունեցել հայերեն: Առաջին հայացքից նրա արարքը ծափողջունների է արժանի, որ նա հարգել է մայրենին ու խոսել է հայերենով: Բայց Արա Աբրահամյանի դեպքում դա ոչ թե հարգանքի, այլ անպատվության դրսեւորում է լինում, քանզի նա այնքան վատ է տիրապետում մայրենիին, որ պատկերացնելն անգամ երեակայությունից դուրս է: Խնդիրն այն է, որ համաժողովի աշխատանքային լեզուն ռուսերենն էր եւ հրավիրյալների մեջ Ռուսաստանի Դաշնության բարձրաստիճան այրեր են եղել, օրինակ տրանսպորտի նախարար Մաքսիմ Սոկոլովը, չկանխատեսելով, որ հայերեն ելույթներ էլ կլինեն, Արա Աբրահամյանի երկարաշունչ ելույթին հետեւել է առանց թարգմանչական սարքի: Երբ Աբրահամյանը վերջացրել է ելույթը, կրկին հայերենով դիմել է Մաքսիմ Սոկոլովին` կատակելով. «Ոչինչ չհասկացաք չէ՞»,-պարոն Սոկոլովը կրկին չհասկացավ եւ քաղաքավարությունից ելնելով` ժպտաց. «Այ, ես էլ, երբ ինչ- որ տեղ եմ գնում եւ խոսում են այնպիսի լեզուներով, որ չեմ հասկանում, ձեր պես դեմքիս այնպիսի լուրջ արտահայտություն եմ տալիս, թե իբր հասկանում եմ»,- մինչեւ վերջին խազն անմեղսունակություն է դրսեւորել Արա Աբրահամյանի՝ հարուցելով ներկաների քրքիջը: Ֆորումին ներկա վարչապետ Կարեն Կարապետյանը նույնպես լիաթոք ծիծաղել է, ապա լակոնիկ Մաքսիմ Սոկոլովին թարգմանել` ինչն ինչոց է: Փաստորեն, այս մարդը ոչ միայն բնատուր անտաղանդ է, այլեւ ֆենոմենալ ժլատ, որ ափսոսում է մի երկու կոպեկ ծախսել թարգմանիչ ունենալու համար եւ փրկել իրեն ու ընդհանրապես հայ ժողովրդին համաշխարային մակարդակով խայտառակվելուց: Մնում է միայն հասկանալ, թե այսքանից հետո կա մեկը, որը կարող է նման մարդու խոսքը լուրջ ընդունել եւ հավատալ նրա ձեռնարկներին, որպիսին այսօրվա ֆորումն է եղել: Բայց դա մեր Աբրամովիչին ամենաքիչն է թերեւս հետաքրքրում, նա իր առաքելությունը կատարել է ու Վլադիմիր Պպուտինի այցի օր ոչ պատահականորեն նշանակել այս կոնֆերանսն ու ռուսաստանահաճո բազմաթիվ հայտարարություններ արել: Արա Աբրահամյանը ասել է, որ լավատեսորեն է վերաբերվում ԵԱՏՄ-ի ապագային. «Հայաստանը ձգտում է դառնալ ԵԱՏՄ, ապագայում նաեւ Կենտրոնական Ասիայի տեխնոլոգիական կենտրոնը, դառնալով Մետաքսի ճանապարհի դարպասը: ՀՀ-ն կդառնա աշխույժ խաչմերուկ: Ես լավատեսորեն եմ նայում ԵԱՏՄ ապագային եւ դա անում եմ սթափ, առանց վարդագույն ակնոցի»: Նա ուրիշ բաներ էլ է ասել, միայն թե դա որեւէ մեկին դժվար թե հետաքրքրի: Անի Սահակյան