Բռնություններ՝ ԶԼՄ ներկայացուցիչների նկատմամբ /տեսանյութ/

Խոսքի պաշտպանության պետական կոմիտեի  նախագահ Աշոտ Մելիքյանը ներկայացրեց Հայաստանում խոսքի ազատության վիճակի և լրագրողների ու ԶԼՄ-ների իրավունքների մասին 2015թ. տարեկան զեկույցը: «Այս տարվա զեկույցն ամենահաստափորն է՝ 82  էջից է բաղկացած: Նման բան չի եղել ԽԱՊԿ գործունեության 13 տարիների ընթացքում: Դա պայմանավորված է նրանով, որ 2015-ը բարդ ու լարված տարի էր, որն ուղեկցվեց լրատվամիջոցների, լրագրողների նկատմամբ ֆիզակական բռնություններով և այլ խոչընդոտներով»,- երեկ հրավիրված ասուլիսին  ասաց  Աշոտ Մելիքյանը: Բանախոսի փոխանցմամբ ՝ բավական է հիշել հունիսի 23-ին Բաղրամյան պողոտայում տեղի ունեցած իրադարձությունները. «Ոստիկանության ծառայողների կողմից բռնության ենթարկվեցին լրագրողները: Լրագրողական գործունեության նկատմամբ խոչընդոտների ու բռնության առումով 2015-ն իր ծավալներով ավելին էր, քան տխրահռչակ 2008 թվականը»: Աշոտ Մելիքյանը փաստեց, որ հունիսի 23-ին ֆիզիկական բռնության են ենթարկվել տարբեր լրատվամիջոցների 13 աշխատակիցներ: «ԶԼՄ-ների ևս 11 ներկայացուցիչ բախվել է այլ խոչընդոտների»,- նշեց բանախոսը: Աշոտ Մելիքյանը առանձնացրեց «Արմենիա Մարիոթ» հյուրանոցի մոտակայքում «A1+»-ի և Ազատություն ռադիոկայանի լրագրողների նկատմամբ բռնության դեպքը. «Նշեմ նաև Սամվել Ալեքսանյանի տան և պահեստների մոտ տեղի ունեցած միջադեպը, ուր Aravot.am-ի և NewsBook.am-ի լրագրողները բռնության ենթարկվեցին: Ամենատագնապալին այն է, որ որևէ մեկը պատասխանատվություն չի կրում»,- ընդգծեց Աշոտ Մելիքյանը: Անդրադառնալով Սահմանադրական փոփոխություններին` բանախոսը նշեց, որ արձանագրել են երկու ֆիզիկական բռնության դեպք. «Եղել են խոչընդոտներ, ինչպես նաև քարոզչության ժամանակ էլ է արձանագրվել ֆիզիկական բռնության դեպք»: Համեմատական անցկացնելով նախորդ տարվա տվյալների հետ` Աշոտ Մելիքյանն ասաց, որ 2015 թվականին ԽԱՊԿ-ն արձանագրել է լրագրողների նկատմամբ ֆիզիկական բռնության 8 դեպք: «Այս ցուցանիշը թեև մեկով պակաս է 2014-ի համեմատությամբ, սակայն հարձակումներից տուժած լրագրողների քանակով տարին աննախադեպ էր՝ 23: 2015-ին ԶԼՄ-ների նկատմամբ տարբեր ճնշումների թիվը հասավ 67-ի՝ 24-ով ավելի քան 2014 թվականին: 2015 թվականին արձանագրվել է տեղեկատվություն տարածելու և ստանալու խախտման 30 դեպք, որը 17-ով ավելի էր 2014 թվականից»,-եզրափակեց Աշոտ Մելիքյանը: Աստղիկ Ավագյան