Որտեղ են մսխում գումարները. նամակ՝ վարչապետին

Հարգելի պրն. վարչապետ, Ձեզ է գրում մի հասարակ քաղաքացի, որն իր ազատազրկումն է կրում կալանավայրում։ Ձեր որդեգրած քաղաքականությունն իմ մեջ հույս առաջացրեց, հավատ ներշնչեց, որ միասին կարող ենք փրկել անդունդի եզրին հասած մեր պետությունը, լցնել բյուջեն, փակել վատնումների խողովակները։ Ես կներկայացնեմ ընդամենը մի ոլորտ, որտեղ հսկայական գումարներ են մսխվում, եւ որոնք խնայելով՝ կարելի է բյուջեի մեծ խնայողություններ անել։ Խոսքն արդարադատության համակարգի մասին է։ Եթե կիրառվի դատապարտյալի վաղաժամկետ ազատման դրույթը, տասնյակ միլիոնավոր դոլարներ կխնայվեն։ Եվ կոռուպցիայի մի խողովակ կփակվի։ Ոչ մեկի համար գաղտնիք չէ, որ դատապարտյալները փողի քսակ են այս համակարգի շատ պաշտոնյաների համար, եւ այստեղ մեծ փողեր են պտտվում։ Եթե անգամ թողնենք ստվերային շրջանառությունը, ապա միայն դատապարտյալին հատկացվող օրապահիկից՝ ամսական 120 հազար դրամից, ծախսվում է ընդամենը 30 հազար դրամ եւ գնվում է ամենաանորակ կրուպեղեն։ Մնացածը գրպանվում է։ Իմ նշած տվյալներն ստուգելը բարդ չէ, բավական է Իշխան Զաքարյանի Վերահսկիչ պալատը մի քանի օրով հյուրընկալվի որեւէ քրեակատարողական հիմնարկում, բացահայտված արդյունքներից ինքներդ կապշեք։ Հենց այս պատճառով էլ վաղաժամկետ ազատման դրույթը չի աշխատում՝ այսքան մարդ հո եկամտից չի՞ զրկվելու։ Ինչքան շատ կալանավոր, այնքան շատ եկամուտ։ «Նուբարաշեն» ՔԿՀ