Ալիևը նոր լարվածություններ է ստեղծում ղարաբաղա-ադրբեջանական սահմանում
Հոկտեմբերի 11-ին Ստրասբուրգում շարունակվող Եվրոպայի խորհրդի խորհրդարանական վեհաժողովի աշնանային նստաշրջանում ելույթ է ունեցել ՀՀ ԱԺ պատգամավոր Միքայել Մելքումյանը: Անդրադառնալով Եվրոպայի Տնտեսական համագործակցության և զարգացման կազմակերպության (ՏՀԶԿ) հետ մեր հարաբերությունների և համագործակցության արդյունավետության բարձրացմանը, պատգամավորը կարևորել է տարածաշրջանային համագործակցության հնարավոր մոդելների կիրառությունը, սակայն ընդգծել մի հանգամանք. «Ինչպե՞ս կարելի է տարածաշրջանում իրականացնել արդյունավետ համագործակցություն, եթե Ադրբեջանը, ըստ էության, տոտալիտար և ագրեսոր պետություն է ցմահ նախագահի ինստիտուտով, փաստը՝ այդտեղ անցկացված վերջին հանրաքվեն, փաստը՝ ս.թ. ապրիլի սկզբին սանձազերծած պատերազմական գործողություններն են ղարաբաղա-ադրբեջանական սահմանի ողջ երկայնքով»: Միաժամանակ Միքայել Մելքումյանը նշել է, որ Ալիևը, ըստ էության, մենատիրական իր իշխանությունը հավերժացնելով, նոր լարվածություններ է ստեղծում ղարաբաղա-ադրբեջանական սահմանում: «Ալիևին նորից զգուշացնում ենք, որ Դուք պարտված եք և առաջինը՝ Ձեր ժողովրդի մոտ: Ադրբեջանի այդպիսի որակի իշխանությունը չի կարող լուրջ ազդեցություն ունենալ, եթե մենք Ձեզ հետ միասին այդ գործողություններին չտանք համապատասխան քաղաքական և իրավական գնահատական»,-իր ելույթի ավարտին ասել է նա:
Հետևեք մեզ Viber-ում
