Ինչ պաշտոններ են տրվելու Դաշնակցությանը

Այսօր ՀՀԿ ԳՄ նիստից առաջ ԱԺ նախագահ Գալուստ Սահակյանը, պատասխանելով լրագրողների`ՀՀԿ-ՀՅԴ կոալիցիա կազմելու մասին հարցին, ասել է . «Բանակցությունները դեռեւս առաջին փուլում են: Խնդիրը նրանում է, որ կոալիցիաները ինքնանպատակ չեն լինում: Այսինքն այն քաղաքական խնդիրները, որ այսօր ունենք, պիտի կարողանանք համաձայնության գալ մեր դիրքորոշումների առումով: Առայժմ այդ փուլում ենք»,- պատասխանել է Գալուստ Սահակյանը: Հարցին, թե ինչ պաշտոններ են տրվելու Դաշնակցությանը՝ Սահակյանը այսպես է պատասխանել. «Դրանք կարող են ածանցյալ լինել: Առաջնայինը քաղաքական համաձայնություններն են: Եթե քաղաքական համաձայնությունը եղավ՝ բնականաբար նաեւ պատասխանատվություն պիտի կրեն, ըստ այդմ էլ նաեւ որոշակի լծակներ կտրամադրվեն»: Ու թեեւ ՀՅԴ Բյուրոյի ներկայացուցիչ Հրանտ Մարգարյանը հայտարարել էր, որ Սերժ Սարգսյանից համագործակցության առաջարկ են ստացել՝ Գ. Սահակյանը պնդել է, թե իրենք ոչ ոքի առաջարկ չեն արել: Այնուհետեւ, երբ լրագրողները հիշեցրել են Հրանտ Մարգարյանի հայտարարության մասին՝ Սահակյանը հավելել է. «Առաջարկներ ունեն եւ Դաշնակցությունը եւ մենք ունենք, էնպես չի, որ ՀՀԿ-ն էստի համեցեք է անում»: ԱԺ նախագահի խոսքով՝ սահմանադրական փոփոխություններից հետո դեռեւս լուրջ աշխատանք կա՝ կապված այն հասարակության մեջ իրացնելու հետ: Բացի այդ, կա նաեւ օրենսդրական մեծ աշխատանք կա, ուստի Դաշնակցությունը ցանկանում է մասնակցություն ունենալ: