Թուրքիայում տնտեսական ճգնաժամ է
Ստամբուլի ամենահայտնի և զբոսաշրջիկների կողմից ամենաշատն այցելվող շուկայի առևտրականներն ու արհեստավորները կանգնած են ֆինանսական մեծ խնդիրների առաջ, գրում է թուրքական «Հյուրիյեթ» թերթը:
Տեղացիների կողմից «Փակ շուկա» (Քափալը չարշը) անվամբ հիշատակվող, իսկ զբոսաշրջիկների շրջանում «Գրանդ բազար» անվամբ ճանաչված շուկայում այս տարի արդեն փակվել է շուրջ 600 մասնավոր խանութ: Դրանց շարքում են պայուսակների, կաշվի և ոսկերչական մի շարք խանութներ:
Նշվում է, որ շուկայում աշխատող մասնավոր խանութների տերերը բողոքում են տեղի վարձակալության չափից դուրս բարձր գներից, որոնք էլ հետևանք են երկրում սկիզբ առած տնտեսական ճգնաժամի:
Ի դեպ` Ստամբուլի «Փակ շուկայում», որտեղ կենտրոնացած են քաղաքի ոսկերիչների և արծաթագործների մեծ մասը,ներկա պահին աշխատում է մոտ երկու հազար հայ ոսկերիչ, իսկ հայերին պատկանող ոսկերչական ապրանքանիշերի թիվն անցնում է հազարը: Հայ ոսկերիչ վարպետներն աշխատում են թե՛ հայկական, և թե՛ թուրքական ոսկերչական կազմակերպություններում:
«Փակ շուկայի» տնօրենների խորհրդի նախագահ Ահմեթ Քյոքլերը հայտնել է, որ այդ թիվը մինչև տարվա վերջ կհասնի մինչև 1000-1500:
Հետևեք մեզ Viber-ում
