Վրաստանում մեկնարկել են խորհրդարանական ընտրությունները

Վրաստանում մեկնարկել է խորհրդարանական ընտրությունների քվեարկությունը, ընտրատեղամասերը բացվել են ժամը՝ 08:00-ին: Այդ մասին հաղորդում է «РИА Новости»-ն: Խորհրդարանի 150 պատգամավորները ընտրվում են 4 տարի ժամկետով: Ընտրություններն անցկացվում են խառը համակարգով՝ 77 մարդ ընտրվում է համամասնական կարգով, 73՝ մեծամասնական: Խորհրդարանում տեղ գրավելու հայտ են ներկայացրել 19 կուսակցություն և 6 ընտրական դաշինք: Հիմնական պայքարը իշխող «Վրացական երազանք» և ընդդիմադիր «Միասնական ազգային շարժում» կուսակցությունների միջև է: Վերջինիս առաջնորդը Օդեսայի մարզպետ, Վրաստանի նախկին նախագահ Միխեիլ Սահակաշվիլին է, որի նկատմամբ հայրենիքում հետախուզում է հայտարարված: Կենտրոնական ընտրական հանձնաժողովի տվյալների համաձայն՝Վրաստանում 73 միամանդատ ընտրատարածքներից 12-ում մեծամասնություն են կազմում էթնիկ փոքրամասնությունները: Ներկայիս խորհրդարանում 3 հայ կա՝ Ռուսլան Պողոսյանը, Հենզել Մկոյանն ու Սամվել Պետրոսյանը, որն այս ընտրություններին չի առաջադրվել: