Խորամանկ ու քծնող գեներալը
Այն, որ Հայաստանի գեներալիտետը վաղուց կցվել է իշխանության գնացքին, ու որպես հերթական վագոն, քարշ գալիս իշխանության հետեւից, բռնում նրա անցած ճանապարհն ու դառնում այդ իշխանության մոլի պաշտպանը, հայտնի է բոլորին։ Բայց որ կարելի է եւ պաշտպանել իշխանություններին, ամենակարեւորը՝ օրվա իշխանություններին ու չհանել ժողովրդական մարդու կերպարը, քչերին է հաջողվում։ Այդ եզակի շնորհով է օժտված Սեյրան Սարոյանը, որի պարագայում աներկբա կարող են ասել՝ ով հարս, ինքը հարսնաքույր։ Վարչապետ էր Հովիկ Աբրահամյանը, նա Աբրահամյանի գովքն էր անում, հիմա Կարեն Կարապետյանը, հոգ չէ՝ նրանը կանի, ընդ որում՝ ձեռքի հետ էլ քար գցելով նախորդի ուղղությամբ։ Օրինակ ԱԺ-ում նա լրագրողներին ասել է, որ պետք է սատարենք նորանշանակ վարչապետին։ «Կարեն Կարապետյանի կառավարությանը պիտի սատարենք, եկեք լավատես լինենք, ոչ թե հըլը չաշխատած մարդու վրա ցեխ շպրտենք», -ասել է գեներալ Սեյրան Սարոյանը: Նրա պնդմամբ՝ Կարեն Կարապետյանը «էն մարդը չի», որ թույլ տա գողանան բյուջեից: «Ինքն իմ ընգերս ա, ես գիտեմ, ինքը թույլ չի տա: Նա էն մարդը չի, որ թողի մեկնումեկը գողություն անի կառավարությունից, կանի խայտառակ աշխարհով մեկ, հավատացեք ընձի, որ Կարենը հաստատ, 100 տոկոսով կանի խայտառակ, մի րոպեում, պուբլիչնի գիտե՞ս ինչ կանի էդ նախարարին», -նշեց Սարոյանը: Գեներալ պատգամավորի խոսքով, Կարապետյանի համար նշանակություն չունի՝ օլիգարխ է, թե ուրիշ մեկը, բոլորն էլ կմուծեն հարկերը. «Կբերեն, ընենց սիրուն տեղը տեղին կմուծեն, որ: Չեն մուծի ...էն Սովետաշենի բերդը ինչի համար ա՞»: Ստացվում է, որ Հովիկ Աբրահամյանի կառավարությունը թույլ է տվել, որ բյուջեից գողանան, մինչդեռ Սեյրան Սարոյանը նույն եռանդով կուրծք էր ծեծում Հովիկ Արգամիչի համար ու Կարապետյանի նշանակման օրը լրագրողներին նախատում, թե «կերել» էիք Հովիկի կյանքը։ Ինչեւէ, Սարոյանը նույն խորամանկությամբ գովերգել է նաեւ պաշտպանության նորանշանակ նախարար Վիգեն Սարգսյանին եւ հակադարձել, որ նա ծառայել է բանակում։ Սարոյանն ասում է, որ նման բան ասողները չարաչար սխալվում են. «Վիգենը, երբ սովորելուց եկել է, եկել է նախարարի հետ. էն ժամանակ նախագահը նախարար էր: Մենք միշտ Վիգենին համարել ենք բանակի տղեն: Իսկ Վիգեն Սարգսյանը շատ լավ բանակը պատկերացնում է, յոթ տարի մեր նախարարի կողքին է եղել: Ամեն ինչում ինքը մասնակցել է»: Դե, ինչ Սարոյանը մեկ անգամ եւս ապացուցել է իր այսրոպեական սկզբունքների մասին, նա կարող է ճիշտ ժամանակին, ճիշտ տեղում գովերգել նրան,ում հարմար է, այսօր Հովիկ Աբրահամյանն է ձիու վրա, գեներալը նրա կողքին է, վաղը մեկ ուրիշը կլինի, գեներալը կտեղափոխվի նրա կողքը, կքծնի նրան, այդ ամենի հետ էլ նա կարողանում է իր ժողովրդական բան ու բասով, լրագրողների հետ մտերմիկ շփումներով ժողովրդական մարդու իմիջ կերտել։ Անի Սահակյան
Հետևեք մեզ Viber-ում
