«Լուծում է պետք, այլապես կարտագաղթենք». ՏՏ ոլորտի մասնագետները ցանկանում են հանդիպել վարչապետի հետ

Այսօր կառավարության շենքի դիմաց բողոքի ակցիա են իրականացնում ՏՏ ոլորտի մի խումբ մասնագետներ: «Եվրոֆուտբոլ» ընկերության իրավաբանական վարչության ներկայացուցիչ Մառլեն Սմբատյանը «Առաջին լրատվական»-ի հետ զրույցում ներկայացրեց խնդիրը և իրենց պահանջները: «Այսօր «Եվրոֆուտբոլ ընկերության աշխատակիցներով եկել ենք այստեղ՝ բարձրաձայնելու մեր բողոքը՝ կապված վերջերս ընդունված Հարկային օրենսգրքի անցումային դրույթներում մեկ հոդվածի ավելացման դեմ. վիճակախաղերի կազմակերպման և ինտերնետ շահումով խաղերի կազմակերպման լիցենզիաների տարեկան պետական տուրքերը հնգապատիկ ավելացնելու կապակցությամբ: Մեր խորին համոզմամբ՝ դա բերելու է ոլորտում աշխատող մի քանի ընկերությունների փակման, գործատեղերի կրճատման, որն առավել ցավոտ է, որովհետև տվյալ ոլորտը սպասարկվում է առավելապես ՏՏ մասնագետների կողմից, և այս գործատեղերի կրճատման արդյունքում նրանք կարտագաղթեն: Խնդրում ենք, որ վարչապետը մեզ ընդունի, մենք ունենք մշակված մի քանի տարբերակներ, որոնց ընդունման արդյունքում շատ ավելի արդյունավետ կլինի, շատ ավելի մեծ գումարներ կմուտքագրվեն պետբյուջե, միաժամանակ հնարավոր կլինի պահպանել որորտի մրցակցությունը: Ներկայիս իրավիճակում, եթե պետական տուրքի չափը մնա այս ավելացված չափով, ոլորտում կմնա մեկ գերիշխող ընկերություն, մյուսները կփակվեն, կձևավորվի մոնոպոլիա»: