Ոստիկանապետի արտահայտությունը վիրավորական է, առկա է գենդերային խտրականություն. փաստաբան

Դատարանում քննվում է վիրավորանքի, խոսքի ազատության և լրագրողական գործունեության սահմանափակման, գենդերային խտրականության վերաբերյալ հայտնի գործը՝ լրագրողուհին հայց է ներկայացրել ՀՀ ոստիկանապետի դեմ: Լրագրողների հետ զրույցում հայցվոր Սիրանուշ Պապյանի ներկայացուցիչ, փաստաբան Դավիթ Ասատրյանը դժգոհություն հայտնեց դատական գործընթացում հետաձգումներից, որոնց նպատակն, ըստ նրա, մոռացության մատնել այս դատական գործը: Ներկայացուցիչը նշեց, որ լրագրողների դեմ վերջերս բազմաթիվ ոտնձգություններ են տեղի ունեցել և դրանց հետ կապված ուղղակի ներողություններ են եղել: Ըստ փաստաբանի, վիրավորանքի, խոսքի ազատության և լրագրողական գործունեության սահմանափակման, ինչպես նաև գենդերային խտրականության փաստերի ճանաչումը ևս մեկ անգամ հնարավորություն կտա պետական պաշտոնյաներին լինել զգոն, հետևել իրենց վարքագծին, որպեսզի լրագրողների իրավունքները պաշտպանվեն: Փաստաբանը նշեց, որ ոստիկանապետի արտահայտությունը, որն ընկած է հայցի հիմքում, վիրավորական է, առկա է գենդերային խտրականություն, ինչը «Կանանց ու տղամարդկանց հավասար իրավունքների մասին» օրենքի խախտում է: «Այս գործն էլ հաստատում է, որ լրագրողների իրավունքները պետք է պաշտպանվեն, մենք պետք է ունենանք լրագրողական ուժեղ համայնք, որը գիտի իր անելիքը և կարող է ապահովել հասարակության համար իր մեծ նշանակություն ունենալը»,- ասաց Դ.Ասատրյանը: Ըստ փաստաբանի, հայցում իրենք անդրադարձել են նաև ՀՀ ոստիկանության հասարակայնության հետ կապերի ու լրատվության վարչության պետ Աշոտ Ահարոնյանի ֆեյսբուքյան գրառմանը, ըստ որի ոստիկանապետի բանավոր խոսքում չեն երևացել գրավոր խոսքին բնորոշ չակերտները: Դ.Ասատրյանը գտնում է՝ բացահայտ է, որ դա վիրավորանք է, «մենք տեսնում ենք, որ որևէ չակերտավոր գործողություն չկա, բացարձակ վիրավորում է»: Ոստիականապետի լրագրողին ուղղված «ես էլ Ձեր մեջ կին չեմ տեսնում» արտահայտության վերաբերյալ  պատասխանողի ներկայացուցիչ Տ.Աթանեսյանը նշեց, թե դա եղել է լրագրողի տված հարցերի էությանը և վարքագծին ադեկվատ, համաչափ պատասխան: «Յուրաքանչյուր քաղաքացի այս երկրում ազատ է ինքնուրույն գնահատելու կա՞ն բարեփոխումներ ոստիկանությունում, թե՞ ոչ. մեկը կարող է գնահատել լավ, մեկը կարող է ասել, որ դրանք չկան, դա քաղաքացու իրավունքն է: Բայց երբ որ դու շփվում ես այն պաշտոնատար անձի հետ, որի վրա այդ բարեփոխումների հիմնական պատասխանատվությունն է դրված և հայտարարում ես՝ ո՞ւր է, չենք տեսնում ձեր բարեփոխումները, հասարակությունը չի տեսնում, խոսքից այն կողմ չեք անցնում, գործի չեք անցնում, մերժողական, բացասական արմատով հարց ես ուղղում մարդուն և, մի քանի անգամ, դու կստանաս համաչափ պատասխան, համարժեք պատասխան: Սա է՝ ինչ որ տեղի է ունեցել»,- «Փաստինֆո»-ին ասաց Տիգրան Աթանեսյանը:

Փաստինֆո