«Բայց պետք է ներդնել, որ ստանալ». Արամ Սաթյան
Այսօր Հայելի ակումբում լրագրողների հետ հանդիպման ժամանակ Կոմպոզիտորների միության նախագահ Արամ Սաթյանն իր տեսակետն արտահայտեց վարչապետի այն հայտարարության վերաբերյալ, որ մշակութային տարբեր ոլորտներ պետք է ոչ թե գումար խնդրեն պետությունից, այլ կարողանան իրենք աշխատել, հարկեր վճարել պետությանը. «Բայց պետք է ներդնել, որ ստանալ: Պետք է գիտենալ ներքին խոհանոցը. Դա սխալ մտածելակերպ է»: Ստեղծագործական միություններին քիչ ուշադրություն է դարձվում: Արամ Սաթյանը հիշում է Խորհրդային տարիներին ստացած իր աշխատավարձը. կարելի էր մեքենա գնել: Այսօր շատ արվեստագետների վարձատրությունը չնչին է. «Ես կուզենայի, որ որևէ նախարար ստանար 50-60.000 դրամ աշխատավարձ ու ապրեր»: Գրողների միության նախագահն էլ առաջ է մղում գրահրատարակչության խնդիրները: Ի տարբերություն այլ կարծիքների՝ Էդվարդ Միլիտոնյանը նկատում է, որ նախկինում էլ աշխատանք տարվել է այս ուղղությամբ: Մշակույթի նորանշանակ նախարարի հետ դրական հույսեր է կապում. «Մշակութային քաղաքականության ամեն մի փոփոխություն հույս է ծնում, որ լավ կլինի»: Էդվարդ Միլիտոնյանը լավ արդյունքներ կակնկալի, եթե նախարարությունում հայտնվեն բանիմաց մասնագետներ, ոչ թե զուտ կատարողներ. «Որևէ նախարար ի վիճակի չէ միայնակ որոշելու, թե ինչ պետք է արվի»:
Հետևեք մեզ Viber-ում
