Մովսես Հակոբյանը պաշտոն ստացավ

Նախագահ Սերժ Սարգսյանի հրամանագրով Մովսես Հակոբյանը նշանակվել է ՀՀ Զինված ուժերի Գլխավոր շտաբի պետ։ Համապատասխան հրամանագիրը Ս.Սարգսյանը ստորագրել է հոկտեմբերի 3-ին։ Մ.Հակոբյանը 2016թ. մայիսի 20-ից զբաղեցնում էր ՀՀ պաշտպանության նախարարի տեղակալ – նյութատեխնիկական ապահովման դեպարտամենտի պետի պաշտոնը։ Մինչ այդ զբաղեցրել է ՀՀ զինված ուժերի գլխավոր շտաբի պետի տեղակալի պաշտոնը: 2007-ից 2015 թթ. եղել է ԼՂՀ պաշտպանության նախարար։ 2007թ. մայիսի 25-ին շնորհվել է գեներալ-լեյտենանտի զինվորական կոչում: Մ.Հակոբյանը ծնվել է 1965թ. փետրվարի 4-ին ԼՂՀ Մարտունու շրջանի Ճարտար գյուղում: Սովորել է Ալմա-Աթայի բարձրագույն զինվորական համազորային հրամանատարական ուսումնարանում: 1986-87թթ. ծառայել է Անդրկովկասյան ռազմական օկրուգի 553-րդ մոտոհրաձգային գնդում, 1987-88թթ.` Աֆղանստանում տեղակայված ԽՍՀՄ ԶՈՒ 40-րդ բանակում: 1988-92թթ. ծառայել է ԽՍՀՄ ԶՈՒ 4-րդ բանակի Ստեփանակերտում տեղակայված 366-րդ մոտոհրաձգային գնդում, որպես վաշտի հրամանատար: 1992-94թթ. մասնակցել է մարտական գործողությունների: 1992-1999թթ. տարբեր զորամասերում զբաղեցրել է մի շարք հրամանատարական պաշտոններ: 1999թ. սեպտեմբերին նշանակվել է ՊԲ հրամանատարի մարտական պատրաստության գծով տեղակալ, 2000թ. փետրվարին` ՊԲ հրամանատարի 1-ին տեղակալ: 2001թ. օգոստոսից 2002թ. հունիսը սովորել է ՌԴ ԶՈՒ Գլխավոր շտաբի ակադեմիայում: