Թուրքական բանակը Սիրիայի տարածքում խրամատներ է փորում

Թուրքիան Սիրիայի տարածք է մտցրել բանակային մեխանիզացված ստորաբաժանումներ, որոնք կառուցում են բետոնե պատեր և փորում խրամատներ, ինչպես նաև շարունակում են օգնել ահաբեկիչներին: Այս մասին ՄԱԿ-ի Անվտանգության խորհրդին և գլխավոր քարտուղար Պան Գի Մունին հասցեագրված նամակում հայտնել է ՄԱԿ-ում Սիրիայի հարցերով ժամանակավոր հավատարմատար Մունզեր Մունզերը՝ փոխանցում է TASS-ը: Դիվանագետի խոսքով՝ 2015 թվականի դեկտեմբերից Թուրքիայի բանակային մեխանիզացված ստորաբաժանումները մտել են Սիրիա, որտեղ կատարել են մի շարք շինարարական աշխատանքներ: Նա մասնավորապես հայտնել է, որ Իդլիբ շրջանի հյուսիսային Հարիմ քաղաքի մոտ թուրք զինվորականները «4 մ լայնությամբ և 8 մ խորությամբ խրամատներ են փորել», իսկ Ռաս-էլ-Այն քաղաքում և դրա արվարձաններում 6 մ բարձրությամբ պատ են կառուցել: Դիվանագետը նաև նշել է, որ թուրքական կառավարությունը «շարունակում է հատկացնել տարբեր տեսակի ռազմական, նյութատեխնիկական և ֆինանսական աջակցություն սիրիացի թուրքմենների ահաբեկչական խմբավորումներին»: