Խաղում են գործարարների ճակատագրի հետ

ԱԺ արտահերթ նիստում քվեարկության ներկայացվեց երեկ քննարկված լրամշակված Հարկային օրենսգիրքը, որի առիթով քննադատությունների պակաս չզգացվեց։ Մինչ քվեարկությունն էլ դահլիճում կրքեր բորբոքվեցին, վարման կարգով ձայնի իրավունք վերցրեցին մի շարք պատգամավորներ։ ԱԺ ՕԵԿ խմբակցության ղեկավար Հեղինե Բիշարյանը հայտարարեց, որ դեմ են քվեարկելու այս փաթեթին՝ հավելելով, որ խորհրդարանը «կրկին կանգնած է կոտրած տաշտակի առջեւ եւ Կառավարության ձեռագիրը չի փոխվել». «Երեկ դատարկ դահլիճում քննարկվել է նախագիծը, որը հաստափոր է և բավականին փոփոխություններով: Եվ այն պետք է քննարկման առարկա դառնար ոչ միայն դահլիճում գտնվող մի քանի պատգամավորների կողմից, այլև մեծ ու փոքր բիզնեսմենների կողմից: Ստացվում է այնպես, որ ձևավորվել է նոր կառավարություն, բայց մենք աշխատում ենք հին ոճով ու ձեռագրով։ Բերել այստեղ փաստաթղթեր, այն էլ՝ Հարկային փաթեթը, որն այստեղ նստածների 80 տոկոսի հետ առնչվում է, բայց չեն էլ հասցրել կարդալ» ասաց Բիշարյանը։ Ռուբեն Հակոբյանն ասաց, որ փաթեթը տնտեսական քաղաքականություն ուղղորդող փաստաթուղթ է, բայց ստացվում է, որ այն ստիպված են ընդունում:«Մի բան հստակ է, որ սա ընդունում ենք, որովհետեւ ստիպված ենք, ժամանակն է այդ ամբիոնից ասել՝ ժողովուրդ, իսկապես պետք է մի քիչ ավելի ձգենք մեր գոտիները: Պատահական չէ, որ ձեր թիմից խոսեց միայն փոխնախագահն, այն էլ ստիպված էր խոսել թիմի անունից: Ես քվեարկությանը չեմ մասնակցելու»,- ասաց նա: ԲՀԿ խմբակցության ղեկավար Նաիրա Զոհրաբյանն էլ պնդեց, որ շատերը այս օրենսգրքին կողմ են քվեարկելու քաղաքական նպատակահարմարությունից ելնելով.«Չի կարելի նման խաղի կանոններ սահմանել, որն ուղղակիորեն կործանելու է փոքր ու միջին ձեռներեցությունը. հորդորում ենք քվեարկության չդնել այս նախագիծը»: ԱԺ նախագահ Գալուստ Սահակյանն արձագանքեց Զոհրաբյանին.«Համոզվեցի, որ շատերը չեն կարդացել նախագիծը»: ԲՀԿ խմբակցության պատգամավոր, «Համախմբում» կուսակցության անդամ Վահե Հովհաննիսյանն էլ ասաց, որ այն վատ մեսիջ է բիզնես դաշտին, ուստի գործընկերներին խորհուրդ տվեց քվեարկությունից առաջ մտածել մարդկանց ճակատագրերի մասին. «Այս օրենսգիրքը շատ վատ մեսիջ է բիզնես խավին, մանվանդ, նոր Կառավարության նոր ծրագիր բերելուց առաջ: Մենք խաղում ենք գործարարների շահերի, գուցե նաև ճակատագրերի հետ»,- ընդգծեց Հովհաննիսյանը: Վարման կարգով խոսեցին նաև ՀՀԿ կուսակցության ներկայացուցիչները: Վարդան Այվազյանը հիշեցրեց, որ Հարկային օրենսգրքի շուրջ 25 քննարկում է եղել, և պատգամավորի կողմից արված 300 առաջարկներից գերակշիռ մասն ընդունվել է: ՀՀԿ խմբակցության ղեկավարն էլ ավելացրեց, թե իր խմբակցությունը դահլիճում նկարվելու համար ելույթ չի ունենում, և նրանք կողմ ենք քվեարկելու, քանի որ մանրամասն քննարկվել է: ՀՀԿ –ի պաշտպանության գործից հետ չմնաց նաեւ Խոսրով Հարությունյանը, ասաց ՝ չգիտի՝ ով ում թելադրանքով է քվեարկում, սակայն «ինքն ըստ էության է քվեարկելու»: «Ես նախագծի վերամշակման բոլոր փուլերին մասնակցել եմ, սա ամենաքննարկված նախագիծն է ԸՕ-ից հետո»,- ասաց Հարությունյանը: ԲՀԿ խմբակցության պատգամավոր Միքայել Մելքումյանն էլ ասաց, որ նախագիծն առաջինից երկրորդ ընթերցում այնքան է փոխվել, որ անհասկանալի է դարձել.«60-ից ավելի առաջարկություններից 20-ն ընդունվել են, բայց առանցքային առաջարկությունները չեն լուծվել: Մենք կրակն ենք ընկնելու այս օրենսգրքի ձեռքը: Կառավարությունը պետք է ունենա համարձակություն, ինչպես կուտակայինի ժամանակ, հետ կանգնի սրանից»,- ասաց ԲՀԿ-ական պատգամավորը:ԱԺ ՀԱԿ խմբակցության պատգամավոր, նախկին վարչապե Հրանտ Բագրատյանն էլ հիշեցրեց, որ 350 առաջարկությունից 149-ը ՀՀԿ-ից է եղել, 201-ը՝ ընդդիմությունից, իսկ 120-ն իրենից.«Այս նախագծով ՓՄՁ-ին գցում ենք վատ վիճակի մեջ»,- ասաց նա: Ի վերջո հայտարարվեց քվեարկության ու ընդունվեց 79 դեմ, 24 ձեռնպահ եւ 1 դեմ ձայների հարաբերակցությամբ: Անի Սահակյան