Աշոտ Աղաբաբյանը հավասարվեց Գագիկ Ծառուկյանին

ԱԺ մոնիտորինգ ծրագրի ղեկավարը Լուսինե Վասիլյանն այսօր լրագրողների հետ հանդիպման ընթացքում ասաց, որ ըստ Ազգային ժողովի 9-րդ նստաշրջանի «ԱԺ մոնիտորինգ» ծրագրի արդյունքների ամփոփման՝ խորհրդարանը 112 օրենք է ընդունել, որոնցից 74-ը՝ արտահերթ նստաշրջանների ընթացքում: Ըստ նրա հաղորդման՝ ԱԺ 12 մշտական հանձնաժողովներից 5-ը որևէ լսում չի կազմակերպել՝ խախտելով ԱԺ կանոնակարգ-օրենքի պարտադիր պահանջը։ Ըստ ուսումնասիրության՝ վատացել է  պատգամավորների նախաձեռնողականության մակարդակը. Նրանք սկսել են ավելի քիչ մտածել օրենքներ գրելու մասին. «Խորհրդարանի կեսը կամ կեսից ավելին, ընդհանրապես, օրենսդրական քննարկումների ժամանակ հարցեր, ելույթներ չի ունենում։ Լուռ պատգամավորների թիվն այս նստաշրջանում 77-ն է՝ նախորդ 67-ի համեմատ։ Այսինքն՝ 131 պատգամավորից 71-ն ընդհանրապես մեկուսացած է և որևէ կապ չունի օրենսդրական քննարկումների հետ։ Դրանք հիմնականում ՀՀԿ-ի ու ԲՀԿ-ի ներկայացուցիչներն են։ ՀՀԿ-ում 69 պատգամավորից հարց չի տվել ու ելույթ չի ունեցել 53-ը, ԲՀԿ-ում՝ 33-ից՝ 24-ը»։ Ամենից շատ կողմ քվեարկել է իշխող Հանրապետական կուսակցությունը՝ 90% արդյունք բոլոր քվեարկություններից։ Ամենից շատ դեմ է քվեարկել «Ժառանգություն» կուսակցությունը, ավելի հաճախ չեն կողմնորոշվել, ձեռնպահ են քվեարկել ՕԵԿ-ի պատգամավորները, իսկ «Բարգավաճ Հայաստան» կուսակցությունը ամենից շատ չքվեարկած ու բացակայած պատգամավորներ ունեցող խմբակցությունն է։ «Բացակայությունների թվով ամենառեկորդային ցուցանիշն այս անգամ գլխավորում է ՀՀԿ-ից Աշոտ Աղաբաբյանը , որը  110 քվեարկություններից բացակայել է 110 անգամ, այսինքն՝ որևէ նիստի չի մասնակցել 105 անգամ քվեարկություններից բացակայել է ԲՀԿ խմբակցության անդամ Հայկ Խաչատրյանը, 103 անգամ՝ ՀՀԿ-ական Արթուր Գևորգյանը»,- ներկայացրեց նա: Ինչպես նշեց նա՝ բացակայությունների թվով ամենառեկորդային ցուցանիշը պատկանում է նաև Գագիկ Ծառուկյանին, որը նույնպես ունի գրանցած  չէ 110 անգամ բացակայություն: Ռ. Սաֆարյան