Վարչապետի 7 հանձնարարականները
Այսօր` Կառավարության նիստի մեկնարկին, ՀՀ վարչապետ Կարեն Կարապետյանը մի շարք նախարարությունների սահմանված ժամկետներում իրականացնելու համար նախատեսված 7 հանձնարարական տվեց: Առաջինը վերաբերում է սննդին. վարչապետը գյուղատնտեսության նորանշանակ նախարար Իգնատի Առաքելյանին հանձնարարեց շեշտը դնել նրա վրա, թե արդյոք սննդի անվտանգության պետական տեսչությունը պետք է լինի նախարարության կազմո՞ւմ, թե ոչ, և ներկայացնել առաջարկություն.«Նախ եւ առաջ վերջին օրերին սննդի անվտանգության պաշտպանության վերաբերյալ սպառողների ներկայացուցիչների ու գործարարների հետ ենք հանդիպել, հանձնարարում եմ Գյուղատնտեսության նախարարին՝ հնչեցված մտահոգությունները ուսումնասիրել՝ շեշտը դնելով այն հարցի վրա, թե լաբորատորիան պետք է լինի ՍԱՊԾ մե՞ջ, թե պետք է լինի անկախ»: Երկրորդը՝ վերաբերում էր սեփականաշնորհված ակտիվներին. «Ունենք սեփականաշնորհված գույք, որ այսօր չի աշխատում, դրա համար Էկոնոմիկայի, Ֆինանսների ու Տարածքային զարգացման նախարարություններին հանձնարարում եմ գույքագրել այդ ունեցվածքը, մշակել ու ներկայացնել չօգտագործվող գույքի վերաբերյալ համակարգային առաջարկություններ»: Երրորդը՝ գնումների վերաբերյալ խնդիրներն են, վարչապետը Կառավարության աշխատակազմի ղեկավար-նախարար Դավիթ Հարությունյանին հանձնարարեց քննարկել կենտրոնացված կարգը, գնումների կազմակերպման մեխանիզմի ներդրման հնարավորությունը և ներկայացնել առաջարկ, թե որ ապրանքներն ու ծառայություներն են նպատակահարմար ձեռք բերել կենտրոնացված կարգով: Վարչապետի չորրորդ հանձնարարականը վերաբերում էր բոլոր գերատեսչություններին. «Գործադիրի բոլոր մարմիններին հանձնարարում եմ վերանայել կառավարության իրենց ոլորտներում գտնվող ՊՈԱԿ-ների գործունեության նպատակահարմարությունը և ներկայացնել առաջարկություն ՊՈԱԿ-ների թվաքանակի կրճատման և օպտիմալացման վերաբերյալ: Բազմաթիվ ՊՈԱԿ-ներ կան, որոնք ունեն հաստատուն ծախսեր, բայց հասկանալի չէ, թե իրենց օգուտը որն է: Ելնելով դրանից, շատ խիստ, կոշտ պետք է վերանայել այդ ամենը»: Հանձնարարականներից հինգերորդը տարածքների համաչափ ու տնտեսական զարգացմանն ուղղված հարցն է. «Տարածքային կառավարման նախարարին հանձնարարվում է մեկամսյա ժամկետում ուսումնասիրել ոլորտի պետական բյուջեի թեմատիկ դաշտերը ու ներկայացնել առաջարկներ, որպեսզի մենք ունենանք հասկանալի վեկտոր, թե ուր ենք գնում»: Վեցերորդը վերաբերում է ԾԻԳ-երին: Հանձնարարվեց Սպորտի, Քաղշին նախարարություններին մեկշաբաթյա ժամկետում քննարկել իրենց կազմում առկա ԾԻԳ-երի լուծարման նախագիծը: Այնուհետև անդրադարձ եղավ տարածքների և համաչափ տնտեսական զարգացման հարցին. «Տարածքային կառավարման և զարգացման նախարարին հանձնարարում եմ մեկամսյա ժամկետում, համագործակցելով Էկոնոմիկայի, Սպորտի և երիտասարդության հարցերի, Կրթության և գիտության, Աշխատանքի և սոցիալական հարցերի, Տրանսպորտի և կապի, Գյուղատնտեսության, Էներգետիկայի և բնական պաշարների նախարարներին ուսումնասիրել և ներկայացնել առաջարկություններ»,- ասաց վարչապետը:
Հետևեք մեզ Viber-ում
