«181 տնտեսվարող սուբյեկտներ 47 մլրդ դրամ պակաս հարկ են վճարել». ՊԵԿ փոխնախագահ

Հայաստանում հարկային եկամուտների հավաքագրման թերակատարում է արձանագրվում: Այսօր այս մասին խորհրդարանում լրագրողներին ասաց Պետական եկամուտների կոմիտեի փոխնախագահ Վախթանգ Միրումյանը: Ըստ նրա՝ եկամուտների թերակատարումը պայմանավորված է տնտեսական ակտիվության և արտաքին շուկաների ազդեցությամբ: «Մենք խոշոր հարկ վճարողների շրջանում ունենք էական թերակատարում: Եվ հաշվի առնելով այն հանգամանքը, որ բյուջեն հիմնականում կառուցված է խոշոր հարկ վճարողների կողմից կատարվող վճարումների վրա, կարող ենք արձանագրել, որ հիմնական թերակատարման պատճառը հենց խոշորների գործոնն է»,- ասաց Միրումյանը՝ հավելելով. «Ես միայն մի թիվ կարող եմ հնչեցնել, որ խոշոր հարկ վճարողների տեսչությունում ունենք հաշվառված 520 տնտեսվարող սուբյեկտներ, և միայն 181 տնտեսվարող սուբյեկտներ առաջին 8 ամիսների ընթացքում, իմ կողմից նշված գործոններով պայմանավորված, 47 մլրդ դրամ պակաս հարկ են վճարել, քան նախորդ տարի»,-ասաց նա։ Բայց, ըստ նրա, ընդհանուր առմամբ նախորդ տարվա 8 ամիսների համեմատ հարկերի թերակատարում չկա, կա ավելացում՝ շուրջ 3 մլրդ դրամի չափով: Չորս հիմնական ոլորտներում գործող խոշոր տնտեսվարողներն են ցույց տվել հարկերի վճարման պակաս գումարներ: Դրանք հետևյալ ոլորտներն են՝ հանքարդյունաբերությունը, որտեղ, Միրումյանի խոսքով, շարունակում են ցածր մնալ մետաղների միջազգային գները, և այդ կազմակերպություններն ունեն հարկային վնասներ: Երկրորդը ֆինանսավարկային խոշոր հատվածն է, որտեղ շահութահարկի գծով հարկային վնասներ են հայտարարագրվել: Երրորդը կապի, հեռահաղորդակցության ոլորտն է, որտեղ ծառայությունների սպառման ծավալները նվազել են: Չորրորդը որոշ արտադրություններ, մասնավորապես, ալկոհոլային խմիչքների արտադրությունը, որոնք արտահանման ուղղություն ունեցող են, արտաքին գործոններով ու ապրանքների իրացման դժվարություններով պայմանավորված՝ վնասներ են կրել: Ըստ Միրումյանի՝ պետական բյուջեում գրված եկամուտների թիվը կանխատեսում է՝ հիմքում ունենալով մի շարք պարամետրեր: «Օրինակ՝ կանխատեսում է, որ հիմքում այն է, որ մեր ՀՆԱ-ի անվանական աճը պետք է լինի 6 տոկոս: Բնականաբար, երբ տնտեսական զարգացումներն այնպիսին են, որ ՀՆԱ-ի աճը ոչ թե 6 տոկոս է, այլ 2.8 տոկոս, բնականաբար, պետք է վերանայվի նաև հարկային եկամուտների մեծությունը»,- ասաց Միրումյանը: ՊԵԿ փոխնախագահ Վախթանգ Միրումյանն, ի տարբերություն վարչապետ Կարեն Կարապետյանի, չի լսել, որ Հայաստանում բիզնեսներ են խլվել: «Ես չեմ լսել նման դեպք: Եթե վարչապետը հայտարարել է նման դեպք, ուրեմն՝ տեղեկություններ կան վարչապետի մոտ»,-ասաց Միրումյանը: Լրագրողների պնդմանը, թե «Հին Էրիվանի» սեփականատերը բազմիցս իր բիզնեսը խլելու մասին հայտարարություններով է հանդես եկել, Միրումյանն ասաց, թե ծանոթ չէ այդ դեպքին. «Ես նման տեղեկատվություն չունեմ, հիմա ես ձեզ ինչպե՞ս պատասխանեմ, որ տեղեկատվություն չունեմ: Ես չեմ լսել, որ չեմ լսել, ասեմ՝ լսե՞լ եմ»: Հարցին, թե խղճուկ բյուջեի առկայության պարագայում պարտադի՞ր են նման ճոխ գնումները, ինչպես ՊԵԿ-ի կողմից մեկ միլիոն դրամով բազմոցի ձեռքբերումը. փոխնախարարը պատասխանեց. «Իհարկե, ճոխությունները պետք է, ընդհանուր առմամբ, կրճատել: Ես չեմ կարծում, որ Պետական եկամուտների կոմիտեում նման ճոխությունների են դիմում: Միգուցե դուք ասում եք բազմոց մեկ միլիոն ութսուն հազար դրամանոց, բայց այդ բազմոցը ոչ թե մեկ բազմոց է, այլ մի ամբողջ կոմպլեկտ է»: