ԱԳ եւ պաշտպանության նախարարները կնշանակվեն մինչեւ շաբաթվա վերջ

Արտաքին գործերի եւ պաշտպանության նախարարների հարցը որոշում է հանրապետության նախագահը, նշանակումները կլինեն նախատեսված ժամկետներում:Լրագրողների հետ զրույցում ասաց ԱԺ փոխխոսնակ Էդուարդ Շարմազանովը՝ նշելով, որ մինչեւ շաբաթվա վերջ Կարեն Կարապետյանի կառավարության կազմն ամբողջությամբ կձեւավորվի: Դիտարկմանը, որ ՀՀԿ-ն պատասխանատվություն է կրում նաեւ բոլոր մանր գողությունների համար, ինչի մասին կառավարության նիստում խոսեց նորանշանակ վարչապետ Կարեն Կարապետյանը, Շարմազանովն արձագանքեց. «Քաղաքական պատասխանատվությունը և քրեական պատասխանատվությունը պետք է տարբերակենք: Երբ որ ասում են քաղաքական պատասխանատվություն, դա քննություն է ընտրությունների ժամանակ: Պարզ ու շիտակ ասում ենք, որ բարեփոխումներից հետո դերակատարությունը շեշտակի ավելացել է և ցանկացած գործչի գործողությունները պայմանավորված պետք է լինեն ոչ միայն նրա անձնական սխալներով, այլ դրա համար պատասխանատվություն կրի այն քաղաքական ուժը, որը նշանակել է այդ պաշտոնյային այդ պաշտոնում»: