Դա կարող է միայն բանալի սարքողի համար ինչ-որ խնդիր լուծի. Խաչատուր Քոքոբելյան

Այսօր Ազգային ժողովի արտահերթ նիստում քննարկվում է  Հայաստանի Հանրապետության հարկային օրենսգիրքը երկրորդ ընթերցմամբ ընդունելու մասին հարցը։ Պատգամավոր Ալեքսանդր Արզումանյանը հայտարարեց, որ իր համար անհասկանալի է արտահերթ ռեժիմով օրենսգիրքն ԱԺ քննարկման ներկայացնելը, որովհետև իրենք չգիտեն նոր կառավարության կոնցեպտը. «Եկել է նոր վարչապետ, ինչ-որ տեսլականի մասին է խոսել։ Որքանո՞վ է այս նոր օրենսգիրքը համապատասխանելու իր նոր ծրագրի փիլիսոփայությանը։ Արդյո՞ք այս Հարկային  քաղաքականությունը սպասարկելու է իր՝ որպես կառավարության ղեկավարի  ծրագրի իրականացմանը, չգիտենք։ Կգար ծրագիրը, կկարդայինք»։ Այնուհռտև հայտարարեց, որ դեմ է քվեարկելու: Խաչատուր Քոքոբելյանն էլ հայտարարեց. «Շրջանառության հարկի հետ կապված հստակ հիմնավորում ունեիք՝ ինչու 115 մլն դրամ: Հիմա ասում եք՝ բերեք 58 մլն դարձնենք: Օրական 160-170 հազար դրամ է կազմում: Հետհաշվարկ արեք՝ 165 հազար դրամից ինչքա՞ն փող է մնալու, որ լույսի վարձ տա եւ այլն մարդը: Դա գոնե արտոնություն մի՛ ներկայացրեք: Դա կարող է միայն բանալի սարքողի համար ինչ-որ խնդիր լուծի»: Նա նշեց, որ այս Հարկային օրենսգրքի նախագիծը որևէ հստակ մեխանիզմ չի սահմանում, որը կկրճատեր ստվերը: «Հայաստանում կոռուպցիան, ստվերը կրճատելու համար մենք հստակ առաջարկներ ենք արել, որ կարելի է հստակ դրույքաչափեր սահմանել, և այդ դրույքաչափերից հետո այլևս խաղի կանոնը բոլորի համար կլիներ նույնը: Ինձ համար մնում է տարօրինակ, երբ մենք նեղ մասնագիտական մակարդակում գալիս ենք ճիշտ եզրահանգումների, բայց դրանց արտացոլումն այս նախագծում չենք տեսնում»,- ասաց Քոքոբելյանը: