«Դուք վարչապետի ձեռքերը կապում եք». Ալեքսանդր Արզումանյան

Այսօր Ազգային ժողովի արտահերթ նիստում քննարկվում է  Հայաստանի Հանրապետության հարկային օրենսգիրքը երկրորդ ընթերցմամբ ընդունելու մասին հարցը։ Պատգամավոր Ալեքսանդր Արզումանյանը հայտարարեց, որ իր համար անհասկանալի է արտահերթ ռեժիմով օրենսգիրքն ԱԺ քննարկման ներկայացնելը, որովհետև իրենք չգիտեն նոր կառավարության կոնցեպտը. «Եկել է նոր վարչապետ, ինչ-որ տեսլականի մասին է խոսել։ Որքանո՞վ է այս նոր օրենսգիրքը համապատասխանելու իր նոր ծրագրի փիլիսոփայությանը։ Արդյո՞ք այս Հարկային  քաղաքականությունը սպասարկելու է իր՝ որպես կառավարության ղեկավարի  ծրագրի իրականացմանը, չգիտենք։ Կգար ծրագիրը, կկարդայինք»։ Ըստ նրա՝ կառավարությունը պարտավորություն է ստանձնել միջազգային ֆինանսական կազմակերպությունների առջև՝ մինչև այս ամսաթիվն ընդունել նոր օրենսգիրք, սակայն չի կարող նման բան լինել։ «Դուք վարչապետի ձեռքերը կապում եք, այսինքն՝ պարտադրում եք մի օրենսգիրք, որի մշակմանը չի մասնակցել, պատկերացում չունի։ Մարդն այս ամբիոնից հայտարարեց,  որ տնտեսությունը ծայրահեղ ծանր վիճակում է։ Հիմա դուք այդ ծայրահեղ ծանր վիճակի հասցրած կառավարության օրենսգիրքը բերել, ասում եք՝  այս օրենսգրքով կշարունակես։ Գուցե հարկային քաղաքականության լրիվ այլ կոնցեպտ է ներկայացնում։ Ես դեմ եմ, կսպասեմ վարչապետի ծրագրին, որից հետո իր միջոցով կփորձեմ հարցերիս պատասխանը ստանալ»,- հայտարարեց Ա. Արզումանյանը։