Այսօր Թուրքիան սեւ օրեր է ապրում

Այսօր Թուրքիան սեւ օրեր է ապրում, ժողովրդավարության տարրերը, որոնք առկա էին երկրում, վերանում են: Այս մասին Լոս Անջելեսում հայ համայնքի հետ հանդիպման ժամանակ նշել է Թուրքիայի խորհրդարանի հայ պատգամավոր Կարո Փայլանը, հաղորդում է «Ամերիկայի ձայնը»: Նա հանդիպել է հայ համայնքի հարյուրավոր ներկայացուցիչների հետ, ներկայացրել հայ –թուրքական հարաբերությունների, Թուրքիայում ժողովրդավարության վերաբերյալ իր տեսակետները։ Փայլանը Նա Լոս Անջելեսում է գտնվում Հայոց ցեղասպանության ոգեկոչման միացյալ մարմնի հրավերով: «Շատ զգացված եմ հրավերի համար: լոս Անջելեսի հայ համայնքը բավականին իրազեկ է Թուրքիայում տեղի ունեցող իրադարձությունների վերաբերյալ: Նրանք մտահոգ են այնտեղ բնակվող հայ համայնքի ճակատագրով: Ես ուրախ եմ ստանալ նրանց աջակցությունը: Թուրքերը հայերի մասին մեկ նախադասություն գիտեն՝ նրանք դավաճաններ են, դավաճանել են մեզ, դրա համար մենք ստիպված ենք եղել նրանց հեռու ուղարկել: Նրանք չգիտեն, թե ինչ են արել հայերն այստեղ, չգիտեն նախկին պատգամավորների մասին: Ես ուզում էի ցույց տալ, որ եղել են հայ պատգամավորներ, որոնց երազանքը միասին խաղաղ ապրելն էր»,-ասել է նա: Կարո Փայլանի խոսքով, թուրքերը միշտ ժխտում են Ցեղասպանության փաստը, բայց մենք պետք է իրական փաստերը ցույց տանք: «Քրդերը 100 տարի անց անցնում են նույնի միջով միայն այն պատճառով, որ Թուրքիան չի ընդունել հանցանքը: Թուրքիայի միակ փրկությունը ժողովրդավարական երկիր դառնալն է»: «Այսօր Թուրքիան սեւ օրեր է ապրում, ժողովրդավարության տարրերը, որոնք առկա էին երկրում, վերանում են: Ազգայնական, իսլամական, ծայրահեղական գաղափարներն են սկսել իշխել: Էրդողանը չի ընդունում իր կառավարության հասցեին ոչ մի քննադատություն: Խոսքի ազատության համար այսօր 100-ավոր մարդիկ կալանավայրերում են: Իսկ ժողովրդավար լինելու համար հայերը, քրդերը, թուրքերը պետք է հավասար լինեն: Միայն ժողովրդավար երկիր դառնալու պարագայում Թուրքիան 1915 թվականի տեղի ունեցածը կորակի որպես ցեղասպանություն»,-ընդգծել է Կարո Փայլանը: