Հասկացող տիկինը

Արդարադատության նախարարի պաշտոնակատար Արփինե Հովհաննիսյանը այսօր խորհրդարանում էր ներկայացրեց «Հայաստանի Հանրապետության կառավարության կառուցվածքի մասին» ՀՀ օրենքում փոփոխություն կատարելու մասին նախագիծը: Արփինե Հովհաննիսյանի խոսքով՝ առաջարկվում է Էկոնոմիկայի նախարարությունը վերանվանել Տնտեսական զարգացման և ներդրումների նախարարություն, Տրանսպորտի և կապի նախարարությունը՝ Տրանսպորտի, կապի և տեղեկատվական տեխնոլոգիաների նախարարություն, Էներգետիկայի և բնական պաշարների նախարարությունը՝ Էներգետիկ ենթակառուցվածքների և բնական պաշարների նախարարություն և վերացնել Քաղաքաշինության նախարարությունը: ԱԺ փոխնախագահ Էդուարդ Շարմազանովը, նախ նշեց, որ ՀՀ նախագահի նախաձեռնությամբ ստեղծվել է Սփյուռքի նախարարություն, և բնական է, որպես սփյուռք ունեցող ազգ՝ շատ պահանջված էր այդ նախարարության ստեղծումը:Նա ներկայացրեց Հանրապետական կուսակցության առաջարկը, այն է՝ Սփյուռքի նախարարությունը վերանվանել Սփյուռքի և հայրենադարձության նաախարարության: Շարմազանովը դա բացատրեց նրանով, որ բոլոր սփյուռքահայերի հայացքները պետք է ուղղված լինեն Հայաստանին, և որ դա ուղերձ կլինի աշխարհի հայությանը, որ հայրենադարձությունը Հայաստանի ռազմավարություններից մեկն է: Նա հավելեց, որ ոգեշնչվել են Իսրայելի հաջող օրինակով: Իսրայելը նույնպես մեծ սփյուռք ունեցող երկիր է: Ըստ նրա՝ հեծանիվ հորինելու կարիք չկա, քանի որ ՀՀ-ն կարող է օգտվել նրա ռազմավարությունից: Ի պատասխան ԱԺ փոխնախագահի՝ Արփինե Հովհաննիսյանը, թե առաջինից երկրորդ ընթերցման ժամանակ քննարկման առարկա կդարձնեն ու կառավարության որոշման մասին կհայտնեն կառավարության նիստի ժամանակ: «Հասկանում եմ այն իմաստային բեռը, որ կրում է ձեր առաջարկությունը: Հասկանում եմ՝ ինչո՞ւ եք դա ասում, հասկանում եմ՝ ի՞նչ եք ուզում փոխանցել: Այն մեսիջը, որն ուզում եք փոխանցել, ինձ համար միանգամայն ընդունելի է, և ես այն ընդունում եմ ի գիտություն: Այս փոփոխությունները պայմանավորված են նոր կառավարության կողմից որոշակի առաջնահերթությունների ընդգծմամբ»,- հայտարարեց Արփինե Հովհաննիսյանը: