Որոշում կայացնելու ժամը
Սերժ Սարգսյանը երեկ ելույթ ունեցավ Երևանի Հանրապետության հրապարակում Հայաստանի Հանրապետության անկախության 25-րդ տարեդարձին նվիրված ՀՀ Զինված ուժերի զորահանդեսում: Նա կարևորեց անկախությունը` նշելով. «Քառորդ դար առաջ այս օրը մենք կատարեցինք մեր ընտրությունը հանրաքվեի թերթիկներով, բայց բոլորս էլ գիտենք, որ մեր սրտերում և մեր հավաքական հիշողության մեջ այդ ընտրությունը վաղուց էինք կատարել: Մենք ընտրել ենք ազատությունը դեռ Հայկ Նահապետի ժամանակ: Մենք հավատարիմ ենք այդ ընտրությանը, որ դեռևս նետուաղեղի ժամանակներում ենք կատարել»: Հետաքրքիր է, որ մեր երկրում շատ-շատերը, ու հատկապես իշխող վերնախավներն այս ընթացքում մոռացել են, թե որ երկրից անկախացավ Հայաստանը, ինչ գնով և ինչ խանդավառությամբ: Ասվածն ամենևին չի նշանակում, որ Ռուսաստանի հետ հարաբերությունները մենք պետք է ստորադասեինք: Ամենևին: Բայց, եթե Հայաստանի անկախության սկզբնական փուլում Հայաստան-Ռուսաստան հարաբերություններն իսկապես գործընկերային են, ժամանակի ընթացքում մենք ականատես դարձանք, թե ինչպես է անկախացած Հայաստանի ինքնիշխանությունը կամաց-կամաց նվազում: Հայաստան-Ռուսաստան հարաբերությունները հնարավոր է դարձնել գործընկերային` հավասարը հավասարի հարաբերություններ, իրապես ռազմավարական, բայց դրա համար անհրաժեշտ է, որպեսզի մեր իշխանական վերնախավերը գիտակցեն, որ նույնիսկ Ռուսաստանի հետ կարելի է ավելի արդյունավետ աշխատել: «Այսօր` 21-րդ դարում զենքերը փոխվել են, բայց չենք փոխվել մենք՝ սեփական ազատությունը պաշտպանելու մեր վճռականությամբ», - ասում էր Սերժ Սարգսյանը՝ հավելելով. «Իհարկե, իդեալական աշխարհում իրավունքն է, որ պետք է ծնի ուժ: Բայց այսօրվա աշխարհն ու մեր շրջապատը հեռու են իդեալական լինելուց: Դեռ կան հանգամանքներ, երբ ուժն է ծնում իրավունք: Մենք ունենք մեր իրավունքը և մեր ազատությունը պաշտպանելու ուժը... Ազատությունն ու անկախությունը պաշտպանության կարիք ունեն ոչ միայն արտաքին սպառնալիքներից: Մեր քաղաքացիները ևս պետք է ազատ լինեն, որովհետև ազատ մարդն ու ազատ հասարակությունն անհամեմատ ավելի արդյունավետ են գործում: Մենք կարող ենք և պետք է շարունակենք կառուցել արդյունավետ երկիր, որը կպաշտպանի ազատ քաղաքացուն և ազատ հասարակությանը: Անազատ մարդիկ տեսականորեն կարող են ստեղծել շատ բան, բայց ոչ երջանկություն», - ասաց Հայաստանի նախագահը: Եթե իշխանությունները գիտակցում են, որ ազատությունն ու անկախությունը պաշտպանության կարիք ունեն ոչ միայն արտաքին սպառնալիքներից, այլև քաղաքացիները երկրի ներսում պետք է ազատ լինեն, քանի որ ազատ մարդն ու ազատ հասարակությունն անհամեմատ ավելի արդյունավետ են գործում, ապա ինչու՞ մեր երկրում ազատ չեն իրենց զգում քաղաքացիները` բոլոր ոլորտներում... Արդյունավետ երկիր կառուցելու գրավականը քաղաքացու ազատությունն է երկրի ներսում, ինչն էլ, ի դեպ, երաշխիք է արտաքին սպառնալիքի բացառման: Ազատությունը «դեռևս նետուաղեղի ժամանակներում» կատարած ժողովրդին այսօր հերթական անգամ քաղաքական կյանքում ինչ-որ փոփոխություններով հույս են ներշնչում: Երկար ժամանակ սպասել պետք չի լինի, կարճ ժամանակ անց պարզ կդառնա` երկրի ներսում ՀՀ ազատ քաղաքացու անկախությունն ինչպես է գնահատվելու: Դրա համար ճառերը վաղուց ավելորդ են: Թամար Բագրատունի
Հետևեք մեզ Viber-ում
