Պուտինն ինչպե՞ս շահի նրա սիրտը
ԵԱՀԿ-ում Ադրբեջանի ներկայացուցչությունը բողոք է հղել Աղդամում հայկական ուժերի կողմից անցկացվող զորավարժությունների դեմ, պնդելով, թե այդ նախաձեռնությունը հարցականի տակ է դնում Հայաստանի իշխանությունների՝ խնդիրը խաղաղ ճանապարհով կարգավորելու հանձնառությունը: ԵԱՀԿ-ում ադրբեջանական ներկայացուցչությունը կոչ է արել կառույցում նախագահող Գերմանիային ու Մինսկի խմբի անդամ երկրներին քննադատել ու հորդորել պաշտոնական Երևանին զերծ մնալ քայլերից, որոնք կարող են վնաս հասցնել վերջին ամիսների բանակցային գործընթացի դինամիկան: Մինչև վերջերս, մասնավորապես ապրիլյան պատերազմից հետո նույնիսկ, Ալիևն իր հասարակությանը սնում էր քարոզչությամբ, թե իր բանակը «հուժկու հարված» է հասցրել հայկական բանակին: Բայց բավական էր Երևանում Անկախության 25-ամյակի զորահանդեսին գերժամանակակից «Իսկանդեր» հրթիռային համակարգի ցուցադրությունը սեպտեմբերի 21-ին, Ադրբեջանն արդեն բողոքում է միջազգային կառույցներին.... «Իսկանդեր» հրթիռային համակարգի տրամադրումը Հայաստանին, իրականում, կարող է որոշակի խնդիրներ առաջացնել Մոսկվայի և Բաքվի հարաբերություններում: Սակայն, Մոսկվան, թերևս, պարտադրված էր վերջին շրջանում Հայաստանից հնչող քննադատությունների ֆոնին ինչ-որ քայլ անել: Ռուսաստանի նկատմամբ անվստահությունը գնալով խորանում էր ու մեծանում, Մոսկվան, թերևս, գիտակցեց, որ չի կարող կորցնել Հայաստանի հասարակության վստահությունը: Բացի այդ, Հայաստանում հասարակության շրջանում թերահավատությունը բավական մեծ էր, ապրիլյան պատերազմից հետո` բանակի պատրաստվածության նկատմամբ: Ահա և հզոր զենքերի ցուցադրությունը, վստահաբար, նաև այդ հարցը լուծեցին: Չմոռանանք, որ Սերժ Սարգսյանն իր հայտնի ելույթում անգամ հայտարարեց, որ 80-ականների զենքով ենք կռվում: Դա բավական խորը ազդեցություն ունեցավ հասարակության վրա: Այժմ մթնոլորտը որոշակիորեն, իհարկե, ցրվեց: Սակայն Ռուսաստան-Ադրբեջան հարաբերությունները հազիվ թե տուժեն դրանից, չի բացառվում, որ Մոսկվան մոտ ապագայում փորձի շահել Բաքվի սիրտը` զենքի նոր խմբաքանակ վաճառելով` «Մոսկվայի բիզնեսի» ծաղկման շրջանակներում: Այնպես որ, ամեն ինչ դեռ առջևում է: Ի դեպ, բաց է մնում հարցը, թե արդյոք 200 միլիոնի վարկով Ռուսաստանի խոստացած զինատեսակները կտրամադրեն մոտ ապագայում, թե՞ դրանք կրկին երկարաձգվելու են: Թամար Բագրատունի
Հետևեք մեզ Viber-ում
