Բատկան նորից կատաղեց. «Զզվեցրել են...»
Պաշտոնական Մինսկը դժգոհ է Եվրասիական միության գործունեությունից: Այս մասին Ռուսաստան-Բելառուս միութենական պետության պետքարտուղար Գրիգորի Ռապոտայի հետ Մինսկում կայացած հանդիպման ժամանակ հայտարարել է Ալեքսանդր Լուկաշենկոն: «Մենք այժմ մանրակրկիտ կերպով վերլուծում ենք նախևառաջ Եվրասիական տնտեսական միությանը մեր մասնակցությունը: Եթե այսպես շարունակվի, էլ ի՞նչ իմաստ ունի Եվրասիական միության այսպես կոչված կառավարությունում աշխատող ավելի քան հազար չինովնիկների գործունեությունը: Ո՞րն է դրա արդյունքը: Եվ ինչո՞ւ ես պետք է հոգամ աշխարհի ամենաթանկ քաղաքում` Մոսկվայում աշխատող մեր բարձրակարգ մասնագետների ծախսերը: Չէ որ մենք Եվրասիական միություն ենք գործուղել մեր լավագույն մասնագետներին: Մենք նրանց այստեղ աշխատանք կգտնենք», - ասել է Բելառուսի նախագահը` հավելելով․ - «Մոսկվայում կայացված որոշումներին մենք կհամաձայնենք, միևնույն է՝ դրանք գրեթե չկան: Որոնք էլ արդեն իսկ կայացվել են` խախտվում են»: Լուկաշենկոյի խոսքով, ի դեպ, ինտեգրացիոն մեխանիզմների փաստացի անգործության ֆոնին Մոսկվան շարունակում է ճնշումներ գործադրել Բելառուսի դեմ: «Մենք արդեն մի քանի ամիս է ինչ չենք կարողանում համաձայնության գալ գազի գնի շուրջ: Դրա հետ կապված՝ Ռուսաստանը նվազեցրել է Բելառուս մատակարարվող նավթի ծավալները: Մենք դա ընկալում ենք որպես ճնշում: Բայց ոչ ես, ոչ էլ բելառուսցիները նման ճնշումը հանդուրժել չենք կարող», - հայտարարել է Բելառուսի նախագահը: Ռուսաստան-Բելառուս միութենական պետության պետքարտուղարի հետ հանդիպման ժամանակ Ալեքսանդր Լուկաշենկոն նաև բացատրել է, թե որն է իր նման անկեղծ հայտարարությունների պատճառը: Բելառուսի նախագահի խոսքով՝ ինքը հոգնել է Ռուսաստանի իշխանությունների գործողություններից: ԵՏՄ-ին անդամակցող Բելառուսի և Ղազախստանի նախագահներն ամեն առիթով, երբ հարկ է լինում, ինչպես ասում են, «տեղն են դնում» Կրեմլին` ցույց տալով, որ իրենց երկրների անդամակցությունը ԵՏՄ-ին դեռ չի նշանակում ամեն հարցում զիջել ինքնիշխանություն և իրենց երկրների ոչ շահավետ պայմաններ թելադրել: Ռուսաստանը պարբերաբար արգելափակում է բելառուսական ապրանքների մատակարարումները, այսինքն, ճնշում են գործադրում կառավարության վրա։ Լուկաշենկոն բաց ցույց է տալիս մեխանիզմը` ռուսական կառավարությունը հարձակման հրաման է տալիս Россельхознадзор-ին, և արդյունքում ճնշում է գործադրվում երկրների վրա։ Ու դրա համար Բատկան իրերն իրենց անունով է կոչում. «Արդեն զզվեցրել են։ Բանը բանից անցել է։ Այդպես չի կարող շարունակվել...»: Այստեղ խնդիրն ամենևին էլ էմոցիոնալ վարքագծով հայտնի Բատկան չէ, իսկապես խորքային հարցեր են: Գործընկեր, եթե կուզեք` ռազմավարական պետություն Ռուսաստանը չպետք է վարվի մյուս երկրների հետ ինչպես խելքին փչի: Ու լավ է, որ Բելառուսի և Ղազախստանի նախագահները երբեմն-երբեմն ցույց են տալիս ինքնուրույնություն և ոչ առաջին անգամ: Ի վերջո, այս իրավիճակն է ԵՏՄ-ն ստեղծելու առաջին իսկ օրվանից: Իսկ ինչ վերաբերում է Հայաստանին, ապա Հայաստանի իշխանություններն էլ իրենց հերթին` մեր երկրի համար ոչ շահեկան ինչ-ինչ պայմանների դեպքում պետք է «ատամ» ցույց տան, այլապես` Ռուսաստանը բացառապես իր շահն է հետապնդում, նրան պետք է կանգնեցնել, եթե անհրաժեշտ է` միասնաբար ԵՏՄ մյուս անդամների հետ միասին: Մետաքսյա Շալունց
Հետևեք մեզ Viber-ում
