Պատերազմին ընդառա՞ջ

Սեպտեմբերի 21-ին Երևանի Հանրապետության հրապարակում տեղի ունեցած ռազմական շքերթի ժամանակ ցուցադրված «Իսկանդերը» մեծ իրարանցում է առաջացրել Բաքվում և Անկարայում։ Ադրբեջանական հիստերիան հասել է այն աստիճանի, որ պաշտպանվելու համար սկսել են տարբեր հայտարարություններ անել՝ օրինակ՝ Մոսկվան Երևանին այնպիսի պայմանով է այդ զինտեխնիկան տվել, որ հայկական կողմը չի կարող դրանք Ադրբեջանի ուղղությամբ օգտագործել,  ավելի զավեշտալի տարբերակներ էլ կան, օրինակ՝ այդ զինտեխնիկան Հայաստանին չի պատկանում և Ռուսաստանը դրանք տրամադրել է  միայն զորահանդեսում ցուցադրելու համար: Ստեղծված իրավիճակից հետո մասնագետները սկսեցին ավելի շատ խոսել հոկտեմբերին սպասվող ռազմական գործողությունների մասին: Թեմայի շուրջ զրուցեցինք Պաշտպանության նախկին նախարար Վաղարշակ Հարությունյանի հետ: Մեր զրուցակցի փոխանցմամբ՝ պետք է միշտ սպասել և պատրաստ լինել, իսկ ինչ կախված է, թե նրանք ինչ կանեն, պարոն Հարությունյանը նշեց, որ ամեն ինչ հնարավոր է: «Ես մի բան գիտեմ, որ իրենք լայնածավալ պատերազմի չեն գնա. դրա հավանականությունը շատ քիչ է,բայց չի կարելի բացառել այն հանգամանքը, որ մարդիկ զուրկ լինելով տրամաբանությունից կարող են ռազմական գործողություններ սկսել»,-շեշտեց նախկին նախարարը՝ հիշեցնելով, որ մենք ռազմական առումով միշտ էլ առավել ենք: Հաճախ ոչ մասնագետները գնահատում են տեխնիկայի քանակով, սակայն չպետք է մոռանանք 1990 և 1994թ,երբ թշնամին առավելություն ունենալու հետ մեկտեղ, պարտություն կրեց: «Զինտեխնիկայի քանակով նրանք ունեին առավելություն. զրահատեխնիկայով՝ 2-5 անգամ, ավիացիայով՝ 60 անգամ, զինամթերքով՝ 25 անգամ, սակայն արդյունքում ինչ ստացան՝ Ղարաբաղը կորցրեցին և դրան գումարած ևս 7 շրջան: Նույն իրավիճակն այժմ է և այստեղ խնդիրը նրանում է՝ բանակը մարտունակ է, թ՞ե ոչ»,-ընդգծեց Վաղարշակ Հարությունյանը՝ շեշտելով, որ մենք ունենք այնպիսի զինտեխնիկա, որը նրանք չունեն, իսկ ունացածն էլ սխալ տարբերակով են օգտագործում: Լուսին Միքաելյան