Վտանգավոր բան չեմ տեսնում

Այսօր կառավարության կառուցվածքային փոփոխությունների վերաբերյալ որոշում կայացվեց: Ըստ այդմ՝ էկոնոմիկայի նախարարությունը վերանվանվում է ներդրումների և ձեռնարկատիրությանն աջակցման նախարարություն, էներգետիկայի և բնական պաշարների նախարարությունը վերանվանվում է էներգետիկ ենթակառուցվածքների և բնական պաշարների նախարարություն, տրանսպորտի և կապի նախարարության անվանման մեջ ավելանում է` «տեղեկատվական տեխնոլոգիաների», քաղաքաշինության նախարարությունը ցանկից դուրս է գալիս և դառնում կոմիտե: Հիշեցնենք, որ Քաղաքաշինության նախարարությունը ստեղծվել էր 1995 թ-ին, 2000 թ-ին վերակազմակերպվել ՀՀ տարածքային կառավարման ու քաղաքաշինության գործունեությունը համակարգող նախարարության: Մեկ տարի անց` 2001 թ-ին նախարարությունը վերակազմակերպվեց և կոչվեց ՀՀ քաղաքաշինության նախարարության: ԽՍՀՄ տարիներին էլ գործում էր Շինարարության մինիստրությունը, որը լուծարվելց 1988 թվականին Հայկական ԽՍՀ Մինիստրների Խորհրդի որոշմամբ եւ դարձավ Պետական շինարարական կոմիտե: 1990 թվականին Շինարարական կոմիտեն կրկին վերակազմավորվեց ստանալով Շինարարության մինիստրություն անվանումը։ Չնայած նախարարությունը Ճարտարապետների միության նախագահ Մկրտիչ Մինասյանի սրտով էր եւ դրա համար նա ուրախ էր, որ ոլորտի համար գոյություն ունի առանձին նախարարություն, սակայն նպատակահարմարության տեսանկյունից հավանաբար փոփոխությունը տեղին է։ Մկրտիչ Մինասյանը հիշեցնում է, որ շատ երկրներում նման նախարարություն առանձին գոյություն չունի, օրինակ Ռուսաստանի նման մեծ երկիրը նրա խոսքով առանձին քաղաքաշինության նախարարություն չունի, կա շինարարության նախարարություն.« 90թ-ին էլ մեզ մոտ կոմիտե էր եւ ոչ նախարարություն, դրա մեջ վտանգավոր բան չեմ տեսնում։ Իհարկե, որպես ճարտարապետ լավ է, որ ունեինք նախարարություն, բայց ամեն բան պետք է տեսակարար կշիռների մեջ նայել» ասաց Մինասյանը շարունակելով.«Ըստ էության կառավարությունը օպտիմալացման գործընթաց է սկսել եւ հավանաբար այդ շրջանակներում է, որ քաղաքաշինության նախարարությունը լուծարվում է՝ դառնալով կոմիտե։ Ավելին, ես կարծում եմ, որ կոմիտեիի կարգավիճակում գուցե ավելի ճկուն աշխատի այդ մարմինը, որովհետեւ այդ մարմնի վրա բավականին կարեւոր գործառույթներ են դրված։ Իսկ առանձին նախարարությունը լուծարվեց երեւի թե այն պատճառով, որ մենք շինարարության, ճարտարապետության ոլորտում մեծ ծավալների խնդիրներ չունենք, չնայած անելիքներ կան՝ նորմատիվ ակտեր ունենալ, օրենքներ մշակել, բայց երեւի կոմիտեին կտան այդ լիազորությունները»։ Մկրտիչ Մինասյանին հարցրեցինք, որ եթե գործընթացը օպտիմալացման ծրագրի շրջանակներում է, չի ստացվում, որ այսքան տարի այդ նախարարությունը ավելորդ ծախս է եղել մեր համար Մկրտիչ Մինասյանը չհամաձայնեց դիտարկման հետ«Երեւի տվյալ ժամանակին մեծ նշանակություն են տվել , պետք է հիմա իրենց հարցնել, ովքեր այդ փոփոխությունն իրականացնում են»։ Անի Սահակյան