Կարեն Կարապետյանը հրաժարվում է Սերժ Սարգսյանի քաղաքական թիմից
Վարչապետ Կարեն Կարապետյանը սկսել է ձևավորել իր մենեջերական թիմը: Նախագահ Սերժ Սարգսյանի հրամանով այսօր կատարվել են մի շարք նախարարների նշանակումներ: Նախորդ կառավարության կազմից պաշտոնանկ են արվել գործադիր իշխանության կարկառուն հնաբնակներ ֆինանսների նախարար Գագիկ Խաչատրյանը, կապի և տրանսպորտի նախարար Գագիկ Բեգլարյանը, գյուղատնտեսության նախարար Սերգո Կարապետյանը և էներգետիկայի և բնական պաշարների նախարար Լևոն Յոլյանը: Նախագահի հրամանագրերով գյուղատնտեսության նախարար է նշանկվել Իգնատ Առաքելյանը, տրանսպորտի և կապի նախարար՝ Վահան Մարտիրոսյանը, էներգետիկայի և բնական պաշարների նախարար՝ Աշոտ Մանուկյանը և ֆինանսների նախարար՝ Վարդան Արամյանը: Վերջինս մինչ այդ զբաղեցրել է ՀՀ Նախագահի աշխատակազմի ղեկավարի առաջին տեղակալի պաշտոն: Նրան այդ պոստում փոխարինել է Արգենտինայում ՀՀ արտակարգ և կիազոր դեսպան, նախագահի աշխատակազմի նախկին ղեկավար, Հանրային հեռուստաընկերության խորհրդի նախկին նախագահ Ալիկ Հարությունյանը: Նախկին նախարարներից Դավիթ Հարությունյանը վերանշանակվել է կառավարության աշխատակազմի ղեկավարի պաշտոնում, իսկ Վաչե Գաբրիելյանը՝ միջազգային տնտեսական ինտեգրման և բարեփոխումների նախարար, ով միաժամանակ զբաղեցնում է նաև փոխվարչապետի պաշտոնը: Բացառությամբ վերջին երկուսի՝ մյուս նախարարների նշանակումները կարելի է ասել անսպասելի էին: Մյուսները ՝բացառությամբ Վարդան Արամյանի, ով 2010-12 թվականներին եղել է ֆինասների նախարարի տեղակալ, պետական պաշտոններ չեն զբաղեցրել: Եվ ընդհնրապես այս մարդկանց անուննրը հանրությանը անգամ մասնագիտական գործունեության առումով բոլորովին հայտնի չեն: Հայտնի է միայն, որ Իգնատ Առաքելյանը աշխատել է Երևանի Կոնյակի գործարանում, Աշոտ Մանուկյանը Հրազդանի ՋԷԿ-ի տնօրենն է եղել, Վահան Մարտիրոսյանը Ռոստելեկոմի տնօրենների խորհրդի նախագահն է:Այսինքն՝ նոր նախարաները համապատասխան ոլորտների մենեջերներ են: Առաջին հստակ տպավորությունն այն է, որ նոր վարչապետը հրաժարվում է իշխանության քաղաքական թիմից և ձևավորվում է սեփական մենեջերական կառավարությունը: Եթե ընդունենք, որ նախարարի պաշտոնը քաղաքական է, ապա ենթադրաբար, այդ պաշտոնն զբաղեցնողը պետք է լինի եթե ոչ պրոֆեսիանալ քաղաքական գործիչ, ապա գոնե քաղաքական թիմի անդամ: Նոր նախարարները սակայն, ընդհանրապես քաղաքականության հետ կապ չեն ունեցել. սա փաստ է: Կարեն Կարապետյանը հավանաբար որոշել է տնտեսական բլոկում հենվել բացառապես մասնագիտական կադրերի վրա: Հաշվի առնելով տնտեսության ներկայիս վատթար վիճակը, հնարավոր է, որ սա արդարացված մոտեցում է և արհեստավարժ կառավարությունը կարող է տնտեսության զարագացման խթան դառնալ: Ինքը՝ Կարեն Կարապետյանը ևս ոչ թե քաղաքական գործիչ է, այլ բիզնեսի մենեջեր, ուստի այս մոտոցումը սպասելի էր: Կառավարության ձևավորման այսպիսի տրամաբանությունը հակասում է նոր սահմանադրության տրամաբանությոնը, քանի որ նոր սահմանադրությամբ խորհրդարանը դառնում է վարչապետի ու կառավարության գլխավոր վերահսկողը և առանց քաղաքական թիմերի աջակցության վարչապետի ու կառավարության աշխատանքը դատապարված է տապալման: Մյուս կողմից մենեջերական կառավարության ձևավորման տրամաբանության մեջ ամենևին չի տեղավորվում հայտնի ինտրիգան Դավիթ Հարությունյանի և ինտելիգենտ-անգործունյա Վաչե Գաբրիելյանի ներկայությունը: Հենց միայն այս երկու կադրերի վերանշանակումը բավական է, ասելու, որ նոր կառավարությունն ու նոր վարչապետը աշխատանանքի մեջ լուրջ խնդիրներ են ունենալու: Դավիթ Հարությունյանն իր ներկայությամբ <<զարդարել է>> նախորդ երկու նախագահների կառավրությունը, և հայտնի է իբրև դավեր նյութելու մեծ վարպետ, քառակի չինովնիկ, ով կարող է ժամերով խոսել՝ ապացուցելու համար սեփական տապալման ճշմարտացիությունը: Վաչե Գաբրիելյանը, ով կառավարությանը հիշատակ մնաց նախկին վարչապետ Տիգրան Սարգսյանից, ժամանակին չկարողացավ գլուխ հանել ֆինանսների նախարարությունից: Նրա եվրոպական կրթության և ինտելեկտի իմիտացիան մշտապես կարևորվում էր դրսից ներդրումներ ներգրավելու առումով, բայց այդ ներդրումներն այդպես էլ չտեսանք և ընդհանրապես այս մարդը կարծես դանդաղ աշխատելու խորհրդանիշ լինի՝ որևէ նախագիծ սկզբից մինչև վերջ, այդպես էլ գլուխ չբերեց: Ի՞նչ պետք է տան նոր կառավարությանը այս երկու փտած ու ամորֆացած հները և չորս նորերը, ցույց կտա ամենազոր ժամանակը: Դավիթ Մանուկյան
Հետևեք մեզ Viber-ում
