25 տարիների խորհուրդը. Անկախության ու պատերազմի արանքում
ԶՈՒ գլխավոր շտապի պետ Յուրի Խաչատուրովը ՀՀ անկախության 25-ամյակի առթիվ շնորհավորական ուղերձ է հղել, որում շնորհավորելով ՀՀ անկախության հռչակման 25-րդ տարեդարձի կապակցությամբ` նշել է. «Վատ պաշտպանված երկրի անկախությունը խիստ փխրուն է, խոցելի ու վտանգված: Այդ ճշմարտության խորը գիտակցումով պետք է մեր բանակին անդամագրված յուրաքանչյուր ոք կրի իր ծառայությունը: Այսօրվա անկախությունը հայերի համար դարերի երազանք է եղել: Մեր սերնդին բախտ է վիճակվել իրականություն դարձնել այն, որը մեծ պատիվ լինելուց բացի միաժամանակ մեծ պատասխանատվություն է դնում բոլորիս վրա: Մենք պարտավոր ենք սրբորեն պահել-պահպանել անկախությունը և հաջորդ սերնդին փոխանցել ազատ, ինքնիշխան, ավելի ուժեղ բանակ ունեցող բարգավաճ հայրենիք»: Այնուհետև, նա շնորհակալություն է հայտնել հայրենիքին իրենց նվիրվածությամբ, մարտական գործողությունների ժամանակ աչքի ընկած մեր բանակի զինծառայողներին` հավելելով. «Հպարտությամբ փառք տանք հայրենի հողի համար զոհված մեր հերոս տղաներին ու գլուխներս խոնարհենք նրանց անմոռաց շիրիմների առաջ: Տարածաշրջանում ռազմաքաղաքական լարված վիճակը չի բացառում նոր պատերազմի բռնկումը, որը, իհարկե, մենք չենք ցանկանում, բայց եթե այն կրկնվի, ապա մեր հաղթանակը այդ պատերազմում այլընտրանք չպետք է ունենա: Ահա թե ինչու երբեք չպետք է թուլանա մեր զգոնությունը և այսօր ավելի ուժեղ պետք է լինենք, քան երեկ»: Փաստորեն, ԶՈՒ գլխավոր շտապի պետը ՀՀ անկախության 25-ամյակի նախօրեին չի բացառել` տարածաշրջանում ռազմաքաղաքական լարված վիճակում նոր պատերազմի բռնկումը: Այնպես է ստացվել, որ Հայաստանի անկախության 25-ամյակին մենք կրկին պատերազմի բռնկումը չենք բացառում: Պատերազմի մասին ստիպեց մտածել ապրիլյան քառօրյա պատերազմը, ու դա բնական է: Այսօր Հանրապետության հրապարակում շքեղ զորահանդեսը հպարտության հետ միասին մեզ ստիպում են նաև ոչ մի րոպե չմոռանալ պատերազմի բռնկման մասին: Դրա մասին չմոռանալով, մենք չպետք է մոռանանք նաեւ Հայաստանի պետականությունն ու ինքնիշխանությունն ամրացնելու մասին: 25 տարի քայլելուց հետո մենք պետք է հասնենք նպատակետին` ինքնիշխան պետությանը: ՀՀ քաղաքացին չպետք է նեղանա Հայրենիքից ու հեռանա: ՀՀ քաղաքացին է պետության, բանակի հիմքը: 25 տարին բավարար ժամանակ էր որպեսզի ծանրութեթեւ անենք բոլոր սխալներն ու բացթողումները: Ժամանակ իսկապես, այլեւս չկա: 25 տարին` այլեւս չսխալվել է հուշում: 25 տարիների խորհուրդը` առաջ ընթանալու խորհուրդն է: Թամար Բագրատունի
Հետևեք մեզ Viber-ում
