Խոշոր ավտովթար Երասխավանի ոլորաններում. կա 9 վիրավոր. ՖՈՏՈՌԵՊՈՐՏԱԺ

Երեկ՝ սեպտեմբերի 20-ին, խոշոր ավտովթար է տեղի ունեցել Արարատի մարզում։ Ժամը 20։30-ի սահմաններում Երևան-Երասխ ավտոճանապարհի 53-րդ կմ հատվածում բախվել են Արարատի մարզի Արմաշ գյուղի բնակիչ, 34-ամյա Սևակ Շահբանդարյանի վարած Վազ 2101 մակնիշի 40 XX 909 համարանիշի և Վայոց Ձորի մարզի Քարագլուխ գյուղի բնակիչ, 34-ամյա Վահե Գուլգուլյանի վարած Mercedes մակնիշի 34 CD 907 համարանիշի ավտոմեքենաները։ Ինչպես դեպքի վայրից հայտնում է ֆոտոլրագրող Գագիկ Շամշյանը, վթարի հետևանքով վարորդ Ս. Շահբանդարյանը և նրա ուղևորներ՝ 30-ամյա Խորեն Ղազարյանը, 40-ամյա Արաքս Մարգարյանը, 21-ամյա Ներսես Ղազարյանը, Նարինե Դեմիրճյանը և մյուս վարորդ Վ. Գուլգուլյանն ու նրա ուղևորներ՝ 5-ամյա Սոնա Սաֆարյանը, 9-ամյա Մարիամ Սաֆարյանը և 34-ամյա Լարիսա Սաֆարյանը մարմնական վնասվածքներով տեղափոխվել են Արարատի բժշկական կենտրոն։ Դեպքի վայր են ժամանել Ճանապարհային ոստիկանության 2-րդ սպայական գումարտակի 1-ին վաշտի 2-րդ դասակի աշխատակիցները՝ դասակի հրամանատար Սանասար Հարությունյանի գլխավորությամբ։ Ժամանել են նաև ոստիկանության Արարատի բաժնի օպերատիվ խումբը՝ բաժնի պետ Սևան Քոչարյանի գլխավորությամբ։ Տեղում աշխատել են նաև Արտակարգ իրավիճակների նախարարության փրկարար ծառայության Արարատի հրշեջ-փրկարարական ջոկատը՝ 1 մարտական հաշվարկով։ Վթարի մասին ՃՈ օպերատիվ կառավարման կենտրոնի պատասխանատու հերթապահ Միքայել Աղաբեկյանը տեղեկությունը փոխանցել է Հայաստանի քննչական կոմիտեի Արարատի մարզային քննչական վարչություն, որտեղից դեպքի վայր է ժամանել հատկապես կարևոր գործերով քննիչ Էդգար Խաչիկյանը, ում կողմից փաստի առթիվ նյութեր են նախապատրաստվում։ Ծանուցում. Ենթադրյալ հանցանքի մեջ կասկածվողը կամ մեղադրվողը համարվում է անմեղ, քանի դեռ նրա մեղավորությունն ապացուցված չէ ՀՀ քրեական դատավարության օրենսգրքով սահմանված կարգով` դատարանի` օրինական ուժի մեջ մտած դատավճռով: Լուսանկարները՝ Գագիկ Շամշյանի