Դիրքում կանգնած զինվորը մեր սրբությունն է.Դավիթ Ամալյան

Երգահան Դավիթ Ամալյանը և գրականագետ Դավիթ Գասպարյանը Հայելի ակումբում հրավիրված ասուլիսում  նկատեցին, որ չնայած անկախություն ձեռք բերելուց Հայաստանը կորցրեց շատ արժեքներ, բայց ստեղծեց մի անչափ կարևոր արժեք՝ Հայոց բանակը: «Այսօր դիրքում կանգնած զինվորը  մեր սրբությունն է, բանակն էլ՝ եկեղեցին: Հայրենասիրություն գոռալով՝ հայրենասեր չեն դառնում: Իրական հայրենիք սիրողը և հայրենիքի համար կռվողը դա անում է լուռ՝ առանց կուրծք ծեծելու: Մենք օրինակ մեր ջոկատով խնդիր էինք դրել մեր առջև, որ զինվորական հագուստով քաղաքում չերևանք»,-հայտարարեց  երգահան Դավիթ Ամալյանը, ով դեռահաս տարիքում մասնակցել է Ղարաբաղյան պատերազմին: Գրականագետ Դավիթ Գասպարյանը, խոսելով բանակի մասին, նշեց, որ պարբերաբար հանդիպում է զինվորներին և նրանց մեջ տեսնում հայրենիքի իրական պաշտպաններ.«Ժամանակ առ ժամանակ հանդիպում եմ մեր զինվորների հետ, այցելում տարբեր զորամասեր: Նրանց մեջ տեսնում են այն ոգին, որն անհրաժեշտ է հայրենիք պահելու համար: Այս ամենի հետ մեկտեղ, անսահման ծանր եմ տանում ամեն մի զինվորի մահ՝ թե՛ թշնամու կրակոցից, թե՛ խաղաղ պայմաններում»,-ասաց նա։