«7 դրամանոց» անմեղսունակություն

ՀՀ մոսկվանշանակ վարչապետը հայտարարեց գազի գների նվազեցման մտադրության մասին: Խոսքի առաջին մասում նշեց այլ սպառողների հաշվին, իսկ երկրորդ մասում՝ ծառայությունը մատուցողների հասշվին: Խոսեց նաև կոռուպցիայի դեմ պայքարի համար նորից հանձնաժողովի ստեղծման մասին: Ու սկսվել է մի քննարկում, մի «լավատեսական» դրսևորումներով հուսառատ սպասումներ: Մի խոսքով.-մե քեֆ, մե ուրախություն: Երբ այդ «լավատեսական սպասումները» մատուցում են համակարգի շահառու անմեղսունակները, դա բացատրելի ու հասկանալի է: Բայց երբ նման «լավատեսության» մասին խոսում են արդեն ամեն օր համակարգափոխության անհրաժեշտությունից բարձրաձայնող, մոսկվաստեղծ հայամաֆիայի գործունեության էությունն ու նպատակը հասկացած, հարգանքի արժանացած մարդիկ, մնում ես զարմացած: Ստացվում է, որ պետությունից ու պետական կառավարումից խոսացողների մեծ մասը իրականում չի հասկանում, որ մոսկովյան ծրագրով Գազպռոմի միջոցով Հայաստանը թալանելու ու տնտեսությունը քայքայելու մեջ առաջնակարգ դերակատարություն ստանձնած մարդը, նույն Մոսկվայի նշանակումով վարչապետ աշխատելուց չի կարող այլ բան անել, բացի իր նախորդ գործունեությունը շարունակելը: Հակառակը կարող էր լինել միայն մի դեպքում: Եթե այդ իշխանությունը նա ստացած լիներ ժողովրդից ու հաշվետու ու պատասխանատու լիներ ժողովրդի առաջ: Իսկ այդպիսի էժան քայլերը միտված չեն ու չեն էլ կարող զարգացում ապահովել, կամ կոռուպցիայի վերացմանը նպաստել: Դրանք ուղղված են սկզբնական փուլում «ընդունելի» դառնալուն: Ու ստացվում է, որ բավական է մի յոթ դրամով, մի մասի համար գազի գին իջեցնի, կամ էլ մի քիչ խոսի կոռուպցիայի մասին, մեր մի մասը միանգամից մոռանում է պետություն կերտելու այբուբենն ու սկսում է սովորական դարձած «հույսով լինենք», «ես օպտիմիզմով եմ լցված», «ես հավատում եմ, որ այս անգամ», «այս մեկն ավելի գրագետ է ու աչքիս ավելի ազնիվ» ու այս կարգի այլ լոլոները: Իսկապես որ «ազատատենչ, 7 դրամանոց պետականաշինության անմեղսունակություն»: Ղարաբաղ կոմիտեի անդամ  Ալբերտ Բաղդասարյանի  գրառումը