450.000 դոլար ՝ Մեղրիի Սբ. Սարգիս եկեղեցու վերակառուցման համար

ՀՀ մշակույթի նախարարության ու ՀՀ-ում ԱՄՆ դեսպանատան  միջև այսօր ստորագրվեց «Մեղրի քաղաքի Սուրբ Սարգիս /Սբ. Հովհաննես/ եկեղեցու պահպանության և որմնանկարների վերականգնման նպատակով ԱՄՆ դեսպանի մշակութային պահպանության հիմնադրամի կողմից դրամաշնորհի տրամադրման մասին» հուշագիրը: ԱՄՆ դեսպանի մշակութային աժեքների պահպանության հիմնադրամի ֆինանսավորմամբ կիրականացվեն Մեղրիի Սուրբ Սարգիս եկեղեցու և հարակից տարածքի ջրամեկուսացման , որմնանկարների և ծածկասալերի մասնակի վերականգնման և ամրակայման աշխատանքներ: «Մեզ բոլորիս միավորում է ընդհանուր պատմությունը, մեր մարդկային պատմությունը: Հասկանլով ու հարգանք դրսևորելով պատմության նկատմամաբ՝ մենք արժևորում ենք մեր ընթացիկ կապերը  ու կերտում ենք ընդհաուր ապագան»,- նշեց դեսպան Ռիչարդ Միլսը: Նրա խոսքով՝ իր նրբագեղ որմնանկարներով Սուրբ Սարգիս եկեղեցին մշակութային գանձարանի անզուգական արժեք է թե՛ Հայաստանի, թե՛ աշխարհի համար: «Միացյալ Նահանգների կառավարությունը կարևորում է այս և այլ մշակությաին հուշարձանների ու արժեքների պահպանությունը Հայաստանում, մի երկրի, որ հայտնի է իր հարուստ մշակութային ժառանգությամբ»,- ընդգծեց Հայաստանում ԱՄՆ դեսպանը: Ռիչարդ Միլսը նշեց, որ սա Հայաստանին տրվող տասներորդ դրամաշնորհն է: «Գումարները, որոնք տրվում են մեր կողմից, այն արժեքների պահպանման համար են, որոնք անգին ժառանգություն են ոչ միայն տվյալ երկրի, այլև՝ ողջ մարդկության համար: ԱՄՆ պետքարտուղարությունը հատկացնում է 450.000 ԱՄՆ դոլար՝ պահպանության, վերականգնման աշխատանքների իրականացման համար»,- նշեց դեսպան Միլսը: ՀՀ մշակույթի նախարարի պաշտոնակատար Հասմիկ Պողոսյանն էլ  շնորհակալություն հայտնեց ԱՄՆ դեսպանին այս գաղափարն իրականացնելու համար: «Մենք այս տարի չէինք սպասում նման օժանդակություն հիմնադրամից,  օժանդակությունը տրվեց և  այստեղ պետք է կարևորել հենց Մեղրի քաղաքը, որովհետև այն մեր հարավային  դարպասն է, հիանալի  պատմամշակութային միջուկ  ունի»,- ասաց նա: