Բիզնես խլելը պետք է բացառվի
Հրապարակ օրաթերթը գրում է.Անշուշտ, շատ լավ կլինի, որ մեզանում դադարեցվեն փոքր ու միջին բիզնեսի չպահանջված ստուգումները` ձեռնարկատերերը շունչ քաշեն, կարողանան կենտրոնանալ իրենց բիզնեսի վրա, ազատվեն հարկայինի մամլիչից: Իհարկե, բիզնես խլելը պետք է բացառվի, իսկ նման փորձ անողները պետք է խստորեն պատժվեն: Նման հազարավոր օրինակներ գիտենք մենք, երբ մարդն անզոր է եղել մեր երկրի «հզորների» առաջ, եւ նրանից խլել Են իր եկամտաբեր բիզնեսը, որի վրա տարիների կյանք ու աշխատանք է դրել: Հաճախ «խլելու» գործընթացը կազմակերպվել է էժան գնով վաճառք ստիպելու, երբեմն «փայ» մտնելու ճանապարհով: Եվ այդ միջնադարյան մեթոդներն արմատախիլ անելու Կարեն Կարապետյանի փորձերը ոչ միայն ազնիվ են, ողջունելի, այլեւ արդարության հաստատմանն ուղղված: Անշուշտ, նաեւ շատ կարեւոր է, որ բիզնեսի հետ կապված հարցերն արագությամբ լուծվեն’ պետական ապարատն արագ արձագանքի ձեռնարկատերերի դիմումներին: Այդ առումով Արծվիկ Մինասյանին ու էկոնոմիկայի նախարարությանն ուղղված դիտողությունն էլ երեկվա կառավարության նիստում տեղին է: Բայց ամբողջ բանն այն է, որ այս փոքրիկ լուծումներն իրավիճակի արմատական փոփոխության հանգեցնել չեն կարող: Սրանք կայացած տնտեսություն, բարեկեցիկ միջավայր, ազատ ու հավասար մրցակցային դաշտ ունեցող երկրների համար են, որոնք այնպիսի գլոբալ խնդիրներ չունեն իրենց առջեւ ծառացած, ինչպես Հայաստանը: Սրանք հացի խնդիր, փակ ճանապարհներ, երկիրը լքող քաղաքացի, ահռելի աղքատություն, զրո արտադրություն ունեցող երկրին բնորոշ լուծումներ չեն: Մեր երկրում այսօր արմատական, ոչ ստանդարտ, շոկային լուծումներ են հարկավոր, որը հենց կախարդական փայտիկի դեր կկատարի: Կոսմետիկ փոփոխություններով, բիզնես միջավայրը փոքր-ինչ բարելավելով` իրավիճակը չես փրկի: Օրվա մյուս հրապարակումներին ծանոթացեք թերթի այս համարում:
Հետևեք մեզ Viber-ում
