Սերժ Սարգսյանը հայտարարել է թավշյա հեղափոխության մասին

Նախագահ ՍերԺ Սարգսյանը ելույթ է ունեցել ՀՀԿ խորհրդի նիստում, որտեղ նա մանրամասներ է ներկայացրել վարչապետի փոփոխության հետ կապված իր սապասելիքների մասին. <<Մենք բոլորս շատ լավ գիտենք պարոն Կարապետյանի ունակություններն ու ոճը: Նա իսկապես կարող է առաջնորդել փոփոխությունների մեծ ալիքը Հայաստանում, հասարակությունը տանել դեպի նոր տնտեսական ու քաղաքական ազատություններ, կոտրել ամրացած կարծրատիպերը, տնտեսության շարժին հաղորդել նոր ճկունություն և այլն: Ես վստահ եմ՝ արդյունավետ աշխատելով, Կարեն Կարապետյանը կկարողանա դառնալ փոփոխությունների յուրօրինակ սիմվոլը Հայաստանում: Կկարողանա ապագա բոլոր զարգացումները տանել ՀՀ Սահմանադրությամբ կանխորոշված ուղով, այսինքն՝ ժամանակակից ուղով: Անցած ժամանակահատվածում ես պարոն Կարապետյանի հետ երկար եմ զրուցել: Մենք քննարկել ենք շատ ու շատ հարցեր՝ տնտեսության զարգացմանը նոր թափ հաղորդելուց մինչև Հայաստանի հանրապետական կուսակցությանը նոր ոգի հաղորդելը: Այսինքն՝ գրեթե ամեն ինչի մասին>>,- ասել է Սերժ Սարգսյանը և ավելացրել, որ ինքն ստացել է փոփոխությունների ալիքը վստահորեն առաջ տանելու պատրաստ մարդու դրական պատասխան: Սերժ Սարգսյանը Կարեն Կարապետյանին հռչակել է լայնածավալ փոփոխությունների սիմվոլ՝ ընդ որում ոչ միայն տնտեսության և կառավարման ոլորտում, որտեղ Կարապետյանն ունի որոշակի հաջողված փորձ, այլ նաև քաղաքական համակարգում, որտեղ Կարապետյանը, կարելի է ասել, բացարձակ պրոֆեսիոնալ չէ: Այս մարդը, երբ արդեն ընտրվել էր Երևանի քաղաքապետի պաշտոնում, ինքն իրեն քաղաքական գործիչ չէր համարում և շատ անկեղծ հայտարարում էր, որ ընդամենը մենեջեր է և ոչ թե քաղաքական պաշտոնյա: Բայց արի ու տես, որ Սերժ Սարգսյանը ՀՀԿ խորհդի նիստում, որտեղ հավաքված է երկրի իշխող վերնախավի կորիզը, Հայաստանի հանրապետական կուսակցությանը նոր ոգի հաղորդելու պատասխանատվությունը դնում է, ոչ ավել-ոչ պակաս, Մոսկվայից նոր վերադարձած Կարեն Կարապետյանի վրա: Կարեն Կարապետյանը երբեք կարկառուն ՀՀԿ-ական չի եղել, և իշխող կուսակցության անցած ճանապարհն ու ունեցած ձեռքբերումները երբեք չեն կապվել Կարապետյանի անձի ու գործունեության հետ: Նա ՀՀԿ նեղ կամ լայն օրերին կուսակցության կողքին չի եղել, մինչդեռ նույն դահլիճում նստածներից շատ-շատերը անձնվիրաբար ծառայել են հարազատ կուսակցությանը: Լավ կամ վատ, արդյունավետ կամ ոչ արդյունավետ, բայց ջանքեր են ներդրել հանուն այդ կուսակցության և նրա առաջնորդի: Բայց պարզվում է, այն ինչ արել են կուսակցությունում, Սերժ Սարգսյանին չի գոհացնում, և նա բարեփոխիչ է հռչակում այդ պրոցեսներից  հեռու գտնվող մարդու: Սա յուրօրինակ անվստահություն է սեփական կուսակցական թիմի ու իրեն հավատարմորեն ծառայած անձանց հանդեպ: Սերժ Սարգսյանը նաև ասել է, որ նոր կառավարությունը նորացված Սահմանադրության պայմաններում պետք է աշխատի լիովին այլ փիլիսոփայությամբ: Նա չպետք է վարանի պատասխանատվություն կրելուց, չփորձի իրենից դուրս գտնել մեղավորներ, բաց լինի քննադատության ու համագործակցության համար, բայց և՝ հաստատակամ իր նպատակներում:  Ըստ նախագահի, օգտագործելով ողջ հայության ներուժը, նոր կառավարությունը պետք է վերականգնի իշխանությունների նկատմամբ ամենալայն վստահությունը, գտնի մեր տնտեսության և հանրային կյանքի համար ոչ ստանդարտ լուծումներ, որոնք կերաշխավորեն պետության կայուն զարգացումը և կամրապնդեն Հայաստանի դիրքերը տարածաշրջանում: <<Սահմանադրական բարեփոխումների ոգուն հարիր` նոր կառավարությունը, անշուշտ, ունենալու է գործելու, փոփոխելու և զարգացնելու մեծ ազատություն, հետևաբար նաև ստանձնելու է մեծ պատասխանատվություն: Կարևորը տեմպն է, արագությունը և արդյունավետությունը>>,- ասել է նա:  Այսպիսով՝ Սերժ Սարգսյանը համարյա բաց տեքստով տվել է նաև բոլորին հետաքրքրող հարցի պատասխանը, այն է՝ նոր վարչապետին տրվում է ազատություն շատուշատ հարցերում, մի բան, որը ըստ ամենայնի չեն ունեցել նախկին վարչապետերը: Փաստորեն, կարելի է ասել, որ Սերժ Սարգսյանը գնացել է թավշյա հեղափոխության, և այդ գործընթացը սկսել է ՀՀԿ-ից, որը հետո կարող է տարածվել ողջ համակարգում և երկրում: Սա նշանակում է՝ ՀՀԿ-ի շարքերում կարող է շուտով յուրօրինակ <<չիստկա>> սկսվել, որի ալիքը կարող է սրբել տանել շատերին:   Կարինե  Սարիբեկյան