Ռուհանին այսօր սկսում է երկօրյա այցը Փարիզ

Իրանի նախագահ Հասան Ռուհանին այսօր սկսում է երկօրյա այցը Փարիզ։ Ռուհանին Ֆրանսիայի մայրաքաղաք կժամանի Իտալիայից։ Ռուհանիի այցը սկզբում ծրագրված էր 2015-ի նոյեմբերի 16-18-ը, սակայն նոյեմբերի 13-ին Փարիզում տեղի ունեցած ահաբեկչություններից հետո, որոնք խլեցին ավելի քան 130 մարդու կյանք, այցը հետաձգվեց։ Այս մասին հայտնում է RIA Novosti-ն։ Իրանը հունվարի 16-ին ազատվել է երկրի դեմ սահմանված պատժամիջոցների մեծ մասից։ Սպասվում է, որ եվրոպական ուղևորության փարիզյան հատվածի ընթացքում Ռուհանին կստորագրի Իրանի համար մի քանի նշանակալի գործարար համաձայնագրեր։ Այցի առաջին օրը կնվիրվի Ֆրանսիայի բիզնես-շրջանակների ներկայացուցիչների հետ հանդիպումներին։ Սպասվում է, որ այցի ընթացքում կստորագրվի համաձայնագիր Iran Air-ի և Airbus-ի միջև՝ 114 ինքնաթիռի գնման մասին։ Վաղը Իրանի նախագահը կուղևորվի Ելիսեյան պալատ, որտեղ կհանդիպի Ֆրանսիայի նախագահ Ֆրանսուա Օլանդի հետ։ Հանդիպման ընթացքում սպասվում է մի շարք համաձայնագրերի ստորագրում, որոնք սկիզբ կդնեն պատժամիջոցների վերացումից հետո երկու երկրների միջև հարաբերությունների նոր դարաշրջանին։