Սերժ Սարգսյանը իմ կնքահայրը չէ. ԴԱՀԿ պետը իր արտոնությունների մասին /տեսանյութ/
Այսօր հրավիրված ասուլիսին ՀՀ գլխավոր հարկադիր կատարող Միհրան Պողոսյանն ադրադառնալով իր և Արդարադատության նախարար Արփինե Հովհաննիսյանի «լարված» հարաբերություններին՝ ասաց, որ իրենց հարաբերությունները աշխատանքային են և կառուցողական: «Հարկադիր կատարման ծառայությունը աշխատում է շատ օպերատիվ Արդարադատության նախարարի հետ ու մենաք շատ օպերատիվ լուծումներ ենք ստանում, և դրա համար շնորհակալ ենք նաև Արդարադատության նախարարին»: Լրագրողի հարցին՝ փաստաթղթերով դուք կապ չունեք Հայաստան բանանի ներկրման մենաշնորհ ունեցող Քեթրին ընկերության հետ, հնարավո՞ր է իմանաք, թե ով է կանգնած այդ ընկերության թիկունքում, որ բանանը երեք անգամ թանկ է վաճառում, Պողոսյանը պատասխանեց. «Ես եթե չեմ սխալվում, ասուլիսի սկզբում հայտարարեցի, որ մենք հավաքվել ենք քննակելու 2015 թվականին ԴԱՀԿ-ի կատարած աշխատանքները: Խնդրում եմ ուղղեք հարցեր, որոնք կապված են ԴԱՀԿ-ի հետ եւ ինձ հետ»: Միհրան Պողոսյանը նշեց նաեւ, որ բանանի հարցին բազմիցս պատասխանել է. «Բազմիցս նշել եմ եւ անդրադարձել եմ այդ հարցերին, այն հարցերի պատասխանը, որ կրկնվել է, եկեք չպատասխանենք այդ հարցին»,- ասաց նա: Միհրան Պողոսյանը հերքեց այն լուրը, որ Սերժ Սարգսյանն իր կնքահայրն է: ԴԱՀԿ ծառայության պետը նաեւ հայտարարեց, որ սխալ է այն տեղեկատվությունը, որ իր եկամուտներն աճել են: Միհրան Պողոսյանը չի հիշում մի դեպք, երբ իր անվան հետ կապվող բիզնեսներում վարույթներ իրականացված լինեն: Մեր հարցին՝ ԴԱՀԿ ծառայողների երդման արարողությունը Ծիծեռնակաբերդում կազմակերպելո՞վ է պայմանավորված, որ ԴԱՀԿ-ի կողմից բռնագանձված գումարները նախորդ տարի աճել է. «Ծիծեռնակաբերդի մասով մենք խոսել ենք, վարույթների քանակի փոխկապակցվածությունը ես չեմ իմանում ինչու պետք է կապակցված լինի դրա հետ»: Լրագրողներից մեկը հիշեցրեց, որ տարիներ առաջ ԴԱՀԿ պետը խնդիրներ ուներ արդարադատության նախկին նախարար Գևորգ Դանիելյանի հետ, որից հետո Դանիելյանն ազատվեց աշխատանքից և հարցրեց՝ ի՞նչ արտոնյալ կարգավիճակ ունի Միհրան Պողոսյանը, որը խնդիրներ է ունենում իր ղեկավարի հետ, բայց ղեկավարն է պաշտոնանկ լինում. «Ես չեմ կարծում, որ ես արտոնյալ կարգավիճակում եմ գտնվում, նաև չեմ կարծում, որ նախկին վարչապետի մեկնաբանությունից հետո դա ճիշտ է քննարկելը: Կային բազմաթիվ խնդիրներ: Նախ նա հրաժարական չտվեց, աշխատանքից ազատվեց: Ես չեմ կարծում, որ իմ պատճառով է դա: Մի քիչ ճիշտ չի, որ ես մեկնաբանեմ»,- ընդգծեց ԴԱՀԿ պետը: Աստղիկ Ավագյան Մանրամասները՝ տեսանյութում:
Հետևեք մեզ Viber-ում
