Մոսկվան Անկարային կոչ է արել Սիրիայում չհարվածել ապստամբներին և քրդերին
Մոսկվան հետեւում է Սիրիայի հյուսիսում Թուրքիայի Զինված ուժերի գործողություններին ու կոչ է անում ռազմական գործողությունը համաձայնեցնել Սիրիայի իշխանությունների հետ: Այս մասին հայտնել է ՌԴ ԱԳՆ պաշտոնական ներկայացուցիչ Մարիա Զախարովան, փոխանցում է ՏԱՍՍ-ը: Մոսկվան Անկարային կոչ է արել «ընտրողաբար մոտենալ Սիրիայում հակաահաբեկչական գործողության անցկացման ժամանակ թիրախներ ընտրելիս» և հարվածներ չհասցնել ընդդիմադիր ուժերի և սիրիական քրդերի դիրքերին:«Թուրք գործընկերներին կոչ ենք անում ավելի ընտրողաբար վերաբերվել հակաահաբեկչական գործողության անցկացման համար թիրախների ընտրությանը ու հարվածներ չհասցնել ընդդիմադիր ու էթնիկ խմբերի՝ այդ թվում ԻՊ դեմ պայքար մղող սիրիաբնակ քրդերի տեղակայման վայրերին»- նշել է նա: Հիշեցնենք, որ Թուրքիան Սիրիայում իրականացնում է «Եփրատի վահան» գործողությունը: Թուրքիայի նախագահ Էրդողանը նշել է, որ գործողության նպատակը պայքարն է «Իսլամական պետության» դեմ և քրդերի առաջխաղացման կասեցումը:
Հետևեք մեզ Viber-ում
