ԵԽԽՎ-ն ծախու և անտեղյակ կառույց է.Լարիսա Ալավերդյան
«Հայկական կողմի բավականին պասիվ աշխատանքը հանգեցրեց նրան, որ այսօր ԵԽԽՎ ձմեռային նստաշրջանում երկու հակահայ զեկույց է ընդգրկվել: Հենց այդ քաղաքականության շնորհիվ է, որ այսօր Ադրբեջանը շարունակում է գրեթե նույն գործողությունները, որը թույլ էր տալիս դեռևս 90-ականներին: Ու թեև իր համար բացարձակապես միևնույն է այս զեկույցները կընդունվե՞ն, թե՝ ոչ, քանի որ դրանք ընդունվելուց պարտադիր չեն դառնում»,-Հայելի ակումբում հրավիրված ասուլիսում հայտարարեց «Ընդդեմ իրավական կամակայանության» ՀԿ ղեկավար Լարիսա Ալավերդյանը: «Խնդիրն այն է, որ այդ բանաձևերը շրջանառության մեջ են դրվում, որից կարող է օգտվել միայն ու միայն Ադրբեջանը: Իսկ, եթե մենք գոնե ունենայինք շրջանառության մեջ դրված մեկ այլ բանաձև, ասենք, օրինակ՝ Հայաստանն ամենևին էլ ագրեսոր չէ, կամ դա ազգային ազատագրական պայքարի արդյունք է, մտահոգիչ չէր լինի: Մինչդեռ մենք այդպիսի նախագծեր չունենք և չենք էլ ունեցել ոչ մի միջազգային կառույցում»,- ընդգծեց նա: Ալավերդյանը նկատում է նաև, որ Հայաստանի կողմից վարած ոչ հետևողական քաղաքականության շնորհիվ Հայաստանն այսօր ոչինչ չունի, բացի «ագրեսոր» ստացած կարգավիճակից, մինչդեռ Ադրբեջանն ունի ամեն ինչ և անընդմեջ ընդլայնում է իր հնարավորությունները: «Շնորհիվ Հայաստանի՝ Ադրբեջանն իր գաղափարը կրողն է, իսկ Հայաստանը՝ ոչ»,- հայտարարեց բանախոսը և հավելեց .«ԵԽԽՎ-ն նույն ծախու և անտեղյակ կառույցն է, որտեղ ընդունվում են նման կարգի որոշումներ: Հայկական կողմը կարող է նաև այս թեզը շրջանառության մեջ դնել, այսպիսով ընդգծելով իր աշխատանքը, մինչդեռ այս ուղղությամբ ևս ոչինչ չի արվում»:
Հետևեք մեզ Viber-ում
