ԴԱՀԿ-ն ֆաշիստական կառույց չէ. Միհրան Պողոսյան

Դատական կատարողների միջազգային միության 2016 թվականի Եվրոպական լիագումար նիստը կանցկացվի մայիսին Երևանում, ընդ որում՝ սա առաջին դեպքն է, երբ ոչ միայն Հայաստանում, այլև ԱՊՀ տարածքում  նմանատիպ միջոցառում է անցկացվելու: Այս մասին այսօրվա ասուլիսում հայտարարեց ՀՀ գլխավոր հարկադիր կատարող Միհրան Պողոսյանը՝ ավելացնելով, որ միջոցառումը կկայանա Միջազգային միության նախագահի առաջարկով: Նրա տեղեկացմամբ՝ ակնկալվում է ավելի քան հիսուն երկրների պատվիրակությունների մասնակցություն միջոցառմանը. «Միջազգային համագործակցությունը փոխադարձ շահ է հետապնդում»,- նշեց Մ. Պողոսյանն ու տեղեկացրեց, որ 2015 թվականի ընթացքում ստորագրվել է համագործակցության հուշագիր Սերբիայի դատական կատարողների ազգային պալատի հետ, նաև համագործակցության հիմքեր են դրվել Շվեդիայի, Մեծ Բրիտանիայի և այլ երկրների համապատասխան կառույցների հետ: «Հարկադիր կատարման ծառայությունը պետության մեջ այն օղակն է, առանց որի պետության կենսունակությունը հնարավոր չէ ապահովել»,-ասաց նա և կոչ արեց պահանջատիրոջ տեսակնյունից հարցին նայել: «Հարկադիր կատարման ծառայությունը ֆաշիստական կառույց պետք չէ դիտարկել»,-ասաց նա և նշեց, որ ամեն ինչ անում են, որ քաղաքացիները քաշքշուկի մեջ չընկնեն: «Ես չեմ կարող ասել, որ չկան սխալներ, սակայն այն, որ ամեն օր ԴԱՀԿ-ն ավելի լավ է աշխատում և օպերատիվ, դա կարող եմ փաստել»,-ասաց Միհրան Պողոսյանը: