Ադրբեջանում 15.000 մարդ մարդ է մասնակցել քրեական հեղինակություն Ջանիևի թաղմանը

Ադրբեջանի Լենկորան քաղաքում տեղի է ունեցել քրեական հեղինակություն Ռովշան Ջանիևի թաղումը, ում մարմինը գիշերը տեղափոխվել է Ստամբուլից: Տեղական լրատվամիջոցները հայտնում են, որ թաղմանը ներկա է եղել մի քանի հազար մարդ. փոխանցում է BBC-ն: Ականատեսների խոսքով` Ջանիևին հրաժեշտ տալու է եկել մոտ 15.000 մարդ: Օդանավակայանում նրա մարմինը դիմավորելու տեսանյութում երևում է, որ հավաքվածները բղավում են «Ալլահ Աքբար» և «Ռովշան»: Ջանիևին հուղարկավորել են Կիչիկ շուկայի հարևանությամբ գտնվող գերեզմանոցում` իր հոր կողքին. փոխանցում են տեղի լրատվամիջոցները: Նրա մահվան հանգամանքների մասին քիչ է հայտնի: Հաղորդվում էր, որ Ստամբուլում Ջանիևի վրա են հարձակվել մի խումբ զինված անձինք։ Լուրջ վնասվածքներ է ստացել ոչ միայն ինքը, այլև վարորդը: Երկուսն էլ մահացել են հիվանդանոցում: