Հաշմանդամ երեխայի ծնողին խաբե՞լ են. նստացույց մարզպետի ընդունարանում

Արագածոտնի մարզի Ծաղկահովիտ համայնքի բնակիչ Արայիկ Սարդարյանը ստիպված է եղել դիմելու ծայրահեղ քայլի: Նա  իր կնոջ և անչափահաս երկու երեխաների հետ, որոնցից մեկը` 13 ամյա Գյուլնարան ի ծնե հաշմանդամ է, նստացույց է հայտարարել հենց մարզպետի ընդունարանում: Հայելի.am-ի թղթակցի հետ զրույցում Սարդարյանը ներկայացրեց իր խնդիրը.«Սոցիալապես անապահով ընտանիք ենք: 13 տարեկան աղջիկս հաշմանդամ է ու բնակվելու տեղ չունենք: Մեր գյուղում հատուկ բնակելի շենք է կառուցվել, որը պետք է տրամադրվեր երկրաշարժից տուժած ընտանիքներին: Շենքում 30 ավել բնակարան կար: Կառավարության որոշմամբ այդ բնակարանները պետք է հատկացվեին գյուղի անապահով բնակիչներին: Իմ կարգավիճակը լրիվ համընկնում է: Ես ոչ մի սեփականություն չունեմ` ոչ հող և ոչ էլ տուն: Մինչ խորհրդարանական ընտրությունները նախկին քաղաքաշինության նախարարը եկավ գյուղ: Ես դիմում էի ներկայացրել մարզպետարան` մերժվել էի: Նախարարը ասաց, որ ես դիմում գրեմ իր անունով ու մակագրեց այդ դիմումը: Ես արդեն հերթի մեջ էի: Մարզպետարան վերջին անգամ դիմում եմ գրել օգոստոս ամսին: Փոխմարզպետը` Կարեն Տոնոյանը ասաց` հիմա մերժելու ենք քեզ, բայց դա ձևական բնույթ է կրում: Ես հավատացի»,-պատմեց Արայիկ Սարդարյանը: Սարդարյանի խոսքով` ինքը հեռուստաեթերից է իմացել, որ դեկտեմբերի 31-ին ՀՀ վարչապետ Հովիկ Աբրահամյանը հանձնել է բնակարանատերերի բանալիները: «Պատկերացնում եք իմ վիճակը: Այսքան սպասելուց ու պայքարից հետո: Ես իմ ձեռքի տակ ունեմ այն մարդկանց ցուցակը, ովքեր ապահոված լինելով բնակարաններով օգտվել են այս ծրագրից: Ես իմ հիվանդ երեխու հետ դրսում ապրեմ` ուրիշները մի քանի տուն ունենան: Ծաղկահովիտի հետ կապ չունեցող` Աշտարակի բնակիչը  բնակարան է ստացել»,-ասաց Սարդարյանը և հավելեց.«Ես գնալու տեղ չունեմ: Տարվա մեծ մասը հիվանդանոցներում եմ, իսկ մի մասն էլ բարեկամների տանը: Կնստեմ այստեղ այնքան, մինչև իմ հարցը լուծվի»: Լուսինե Ղազարյան