Վարչախմբի համար մարդու կյանքը ոչ մի արժեք չունի. Վարուժան Ավետիսյանի կոչը Անդրիաս Ղուկասյանին

«Սասնա ծռեր» խմբի անդամ, անազատության մեջ գտնվող Վարուժան Ավետիսյանը  կոչ է արել հասարակական գործիչ Անդրիաս Ղուկասյանին դադարեցնել հացադուլը։ Նշենք, որ Անդրիաս Ղուկասյանը Խորենացի փողոցում զանգվածային անկարգություններ հրահրելու մեղադրանքով կալանավորված է։ Վարուժան Ավետիսյանի նամակում, մասնավորապես, նշված է. «Այսօր տեղեկացա, որ հացադուլի միջոցով ես շարունակում պայքարը: Գործող հակահայ և հակամարդ վարչախմբի համար մարդու առողջությունն ու կյանքը ոչ մի արժեք չունեն, իսկ քո դավանած գաղափարները, ինչպես նաև քո հաստատակամությունն ու նպատակասլացությունը հայտնի են մեր ժողովրդին: Այդ պատճառով՝ որպես հայ մարդ, ՀՀ քաղաքացի և պայքարի ընկեր, կոչ եմ անում դադարեցնել հացադուլը: Քո ավյունն ու գիտելիքներն այսօր շատ անհրաժեշտ են մեր ժողովրդին, ուստի հորդորում եմ քաղաքագիտական վերլուծություններով և քաղաքական հայտարարություններով մասնակցել Հայաստանի Հանրապետության ազատագրման և վերակերտման գործին»: